PH, nisaka sa ika-59 nga pwesto sa Global Competitiveness Report

By Elvira Bongosia

TAGBILARAN CITY, Bohol, Sept. 6 (PIA)--Padayon nga mi-ani og pag-ila ang maayong lihok sa ekonomiya sa Pilipinas.

Gikalipay sa Malakanyang ang resulta sa 2013-2014 Global Competitiveness Report diin nisaka ang pwesto sa Pilipinas sa ika-59 gikan sa kanhi ranking nga ika-85.

Matud pa ni Presidential Spokeperson Edwin Lacierda, nahisulod sa maong report nga mi-uswag ang ranking sa Pilipinas isip usa sa may pinakalig-on nga ekonomiya tungod na usab sa halapad nga kampanya ni Presidente Benigno ‘Noynoy’ Aquino III batok sa korapsyon.

Giingong napamatud-an kini sa dakung kabag-ohan sa sistema sa good governance sa mga nag-unang institusyon sa gobyerno.

Dihang bag-o pa sa katungdanan si Presidente Aquino, nagpakita naman dayon og maayong pag-uswag sa ranking ang nasud gikan sa ika-125 nga pwesto niadtong 2010 hangtud sa ika-79 nga pwesto.

Daku usab ang napakitang paglambo sa Pilipinas kalabot sa pagbatok sa korapsyon nga gikan ika-135, nisaka ang nasud sa ika-87 nga pwesto.

Halos katunga usab ang nahimong paglambo sa ranking sa Pilipinas sa larangan sa innovation nga gikan ika-111 niadtong 2010, naa na sa ika-69 nga pwesto ang nasud.

Giingong pagmatuod kini nga dungan sa nagkakusog nga kompetisyon ang pagsaka usab sa pagsalig ug morale sa mga Pilipino nga mobangon ang nasud sa kakabus.

Usa usab kini ka pag-ila nga naa sa saktong dalan ang pagpatuman sa transparency ug accountability ubos sa pagdumala ni Presidente Aquino.

 (PIA-Bohol/ecb)