Mga nagpakatap nga may krisis sa bugas, pasakaan og kaso sa gobyerno

By Elvira C. Bongosia

Gipahayag ni Agriculture Secretary Proceso Alcala nga walay rice shortage o krisis sa bugas sa nasud.

Matud pa niya, ang mga balitang nikatap kalabot sa kakulang sa bugas hinimo lamang sa mga nagplanong pahimoslan ang mga mamamalit.

Tungod niini, gukdon ug pasakaan sa gobyerno og kaso ang mga nagpakatap sa mga sayop nga balita kalabot sa pag-ubos sa supply sa bugas.

Dugang pa ni Alcala, gitun-an na sa ilang legal team ang posibleng kaso nga economic sabotage batok sa mga adunay kasayuran sa rice panic sa mga mamamalit.

Gi-angkon sa kalihim nga nalambigit niini ang mga dagkung tawo. Giingong posibleng mga rice smuggler kini sila nga naigo sa paghugot sa ahensya sa importasyon sa bugas.

Dugang pa sa kalihim, may pasakaan na sila og kaso sulod ning semanaha.

Gisubli ni Alcala nga walay krisis ug ting-ani na sa mosunod nga semana mao nga gipaabot ang pag-ubos sa presyo sa bugas.  (PIA-Bohol/ecb)