Mga kawani sa BI, gidid-an sa paggamit og cellphones sa oras sa trabaho

TRANSLATED BY: ELVIRA C. BONGOSIA

TAGBILARAN CITY, Bohol, Sept. 11 (PIA)--Gimando karon ni Bureau of Immigration (BI) OIC Commissioner Siegfred Mison sa tanang immigration personnel sa Ninoy Aquino International Airport ug sa ubang tugpahanan sa nasud ang pagbawal sa paggamit og cellphones samtang oras sa ting-trabaho isip parte sa pagbatok sa ahensya sa korapsyon.

Matud pa ni Mison, partikular nga sakop sa maong kamanduan ang tanang immigration officers nga na-assign sa arrival ug departure counters nga maoy adlaw-adlaw nga nag-atubang sa libuan ka pasahero.

Apil usab niining kamanduan ang mga team leaders sa Travel Control and Enforcement Unit ug bisan ang mga acting immigration officers ug confidential agents nga na-assign sa Filipino counters.

Tungod niini, kinahanglang e-deposito sa mga empleyado ang ilang cellphones sa locker o ibilin sa ilang supervisor.

Kun adunay emergency, mahimong makigamit og cellphone ang empleyado sa ilang supervisors.

Gipatuman kini human sa insidente nga nakuhaan sa CCTV ang pipila ka badlongong empleyado nga nalambigit sa pagtabang sa pagpa-ikyas gawas sa nasud o pagsulod sa nasud sa mga blacklisted nga langyaw ug mga biktima sa human trafficking ug mga pugante. (mbcn/ecb/PIA7-Bohol)

http://r07.pia.gov.ph/index.php?article=1081378799765