Dumaguete City mosaulog sa family week

BY: TRANSLATED BY: LEANDRIA P. PAGUNSAN

DUMAGUETE CITY, Setyembre 16 (PIA) -- Ang syudad sa Dumaguete nakighiusa sa tibook nasud sa pagsaulog sa Family Week karong Setyembre 23-27.  Adunay mga kalihukan nga ipahigayon ubos sa pagdumala  sa City Social Welfare Office.

Ang tema sa kasaulogan karong tuiga naga ingon: "Unity Across Generation: A Strong Family, A Strong Society," nga ga tumong sa pagpalig-on sa matag Pamilya.

Si George Silverio ang chairperson sa Family Week celebration mipahibalo nga adunay himoong ecumenical service karong Setyembre 23,  didto sa Cultural Hall sa The Church of Latter-Day Saints sa barangay Tinago.

Karong Setyembre 24 adunay himoong KALIPI family fun day symposium sa Women's Center.

Pagka Setyembre 25 ipahigayon ang Kapihan sa PIA forum sa Bethel Guest House sa buntag ug pagka hapon adunay family dialogue.  

Sa Setyembre 26 himoon ang poster making contest ug pagka Setyembre 27 may skills training gikan sa alas otso sa buntag hangtud alas dose sa udto.

Ang Church of Christ of Latter-Day Saints kon Mormons mopahigayon ug usa ka exhibit kabahin sa family history ug genealogy nga bukas sa publiko. 

Ang City Social Welfare Office mopahigayon usab ug medical & dental mission karong Setyembre 27 didto sa Quezon Park.

Matud pa ni Silverio ang selebrasyon gihimo aron ipalambo ang  katungdanan, katungod ug responsibilidad sa kada miyembro sa pamilya.

Ang kasaulogan sa Family Week natukod pinaagi sa Presidential Proclamation No 60 kaniadtong tuig 1992 ni kanhi  Presidente Fidel V. Ramos.  Ang selebrasyon himoon kada katapusang semana sa bulan sa Setyembre.

Ang  DSWD isip National Committee sa kasaulogan sa Family Week ang nangulo sa selebrasyon  inabagan sa mga ahensya sa gobyerno, NGOs ug  pribadong sektor.(mbcn/LPagunsan/PIA7-Negros Oriental)