Balaod nga maghatag og proteksyon sa mga mamamalit batok price hike sa panahon sa krisis, gilagdaan ni PNoy

TAGBILARAN CITY, Bohol, Sept. 16 (PIA)--Aron panalipdan ang mga mamamalit sa mga magpahimos sa pagsaka sa presyo sa mga panaliton sa panahon sa kalamidad ug emergency situations, gilagdaan ni Presidente Benigno ‘Noynoy’ Aquino III ang balaodnon nga nagduso sa Price Act niadtong Setyembre 6.

Gilagdaan sa Presidente ang Republic Act 10623 o ang balaod nga nag-amyenda sa pipila ka probisyon sa Price Act.

Ubos niining balaod, hatagan og proteksyon ang mga consumers pinaagi sa pagmentenar sa presyo sa mga nag-unang panaliton ilabi na sa panahon sa kalamidad ug emergency situation.

Mas gipalapdan pa usab ang listahan sa mga basic commodities nga dili mahimong isaka ang presyo sa panahon sa panginahanglan.

Nahiapil na ubos ning bag-ong balaod ang mga hinimo dinhi sa nasud nga noodles ug bottled drinking water sa mga listahan sa mga nag-unang panginahanglan aron panalipdan ang mga mamamalit sa kalit nga pagsaka sa presyo kun adunay kalamidad ug emergency situation.

Tungod kay daghan man ang mamalit og instant noodles ug bottled drinking water mao nga gi-apil na kini sa listahan sa mga nag-unang panaliton sama sa bugas, pan, kamote ug susamang mga tanom, lab-as o buwad nga isda ug uban pang marine products, karneng baboy, baka ug manok, itlog, lab-as ug processed nga gatas, utanon ug prutas, kape, asukal, asin, sabong panlaba, kahoy, uling, cooking oil, household liquefied petroleum gas (LPG), kandila, gas ug mga tambal isip mahinungdanon.

Gimando usab sa bag-ong balaod ang pagmugna og Price Coordinating Council diin ang kalihim sa Dept. of Trade and Industry ang chairman ug ang mga kalihim sa Dept. of Agriculture, Dept. of Health, Dept. of Environment and Natural Resources, Dept. of Interior and Local Government, Dept. of Transportation and Communications, Dept. of Justice, Dept. of Energy, National Economic and Development Authority, ug tig-usa  ka representante gikan sa consumers’ sector, agricultural producers’ sector, trading sector, ug manufacturers’ sector isip mga miyembro.

Tumong niining masiguro ang suplay sa mga produkto ug mapugngan ang pagpahimos sa mga negosyante sa nasud

Magpabilin ang price freeze sa mga prime products hangtud di kini tangtangon sa Presidente ug dili molapas sa 2 ka buwan. (PIA-Bohol/ecb)