Mga Kaabag gikan sa pribadong sektor alang sa Modified 4P'spadayong giawhagTungod kay mas lahi ang gikinahanglan sa mga bag-ong benepisaryo.

By Ferliza C. Contratista

CEBU CITY, Enero 8 (PIA) -- Nagpadayon ang pag awhag karon sa mga pribadong mga grupo alang sa pagpahigayon sa Modified Conditional Cash Transfer o nailhan na nga 4 P’s (Pantawid Pamilyang Pilipino Program) karong tuiga. 

Ang Department of Social Welfare and Development dinhi sa rehiyon padayon nga nag-awhag sa mga pribadong grupo, civil society groups og non-government organizations aron nga mahimo kining kaabag sa mas gipalapad nga conditional cash transfer. 

Matod ni Nemia Antipala, ang assistant regional director sa DSWD gikinahanglan ang maong mga grupo alang sa pagpahigayon ug mas mabulokon nga Family Development Sessions (FDS) alang sa mga napiling mga beneficiaries sa maong programa. 

“Gusto nato nga momenos ang kagutom og kalisod dinhi sa atong komunidad og mao kana nga padayon kami nanawagan og mga grupo nga mamahimo namo nga kaabag,” matod ni Antipala. 

Sa pagkakaron adunay mga 17 ka mga grupo nga anaa na nalambigit sa mga kalihokan sa pagpalambo sa mga kinabuhi sa mga pamilya o indibiduwal nga susama sa mga beneficiaries sa MCCT. 

Ang mga makapahimus unya sa bag-ong 4P’s mao ang mga pamilya nga adunay mga anak nga biktima sa krimen, sama sa human trafficking, rape ug uban pa. Lakip usab sa mga benepisaryo mao ang mga pamilya nga adunay mga children with disabilities ug ang mga libud-suroy o mga street children. 

Matod ni Aileen Lariba, ang focal person sa 4P’s sa Central Visayas, tungod kay lahi og mas espesyal ang mga beneficiaries niining MCCT, gikinahanglan og specialized usab ang mga kaabag sa maong programa. 

Ang Family Development Sessions nga gikinahanglan para sa programa mas daghan kumpara sa naandan nga mga pamilya sa nahiunang 4P’s. 

“Once a week ang FDS niining bag-o nga 4P’s imbes kay kausa lang sa usa ka bulan ang panagtagbo,” matod ni Lariba. 

Og apil sa kalahian mao nga imbes social worker lang ang mudumala sa maong panagtagbo, apil na ang ubang representante sa mga ahensya gikan sa panglawas, edukasyon, og adunay usa ka psychologist. 

“Ang atong tumong nga mahaw-as gyud sila sa abnormality nga ilang nasinati. Kun street child ka, haw-ason ka gyud sa kalsada, pa eskwelahon, pa kan-on,” matod ni Lariba. 

Ang matag pamilya makadawat gihapon og susamang kantidad sa orihinal nga 4 P’s; P500 alang sa head of the family og P;300 kada bata matag bulan, di mulabaw og tulo ka bata. 

Ang mga NGO’s o CSO’s nga gusto mga mahimo nga kaabag sa programa gikinahanglan nga musumiter og Updated Work and Financial Plan, Monthly Monitoring Report, Quarterly Accomplishment Report og gikinahanglan nga lisensyado kini. (rmn/FCC/PIA-7 Cebu)