DA midasig sa mga mag-uuma sa Siquijor pagpananum sa kolo

By Rizalie A. Calibo

SIQUIJOR, Jan 8 (PIA) -- Ang Department of Agricutlure (DA) ug Agricultural Training Institute (ATI) sa rehiyon 7 midasig sa katawhan sa Siquijor pagpadaghan sa tanom nga Kolo kon “breadfruit” isip hulip sa bugas aron mouswag ang “food staple sufficiency level” sa isla. 

Ang kolo usa ka kahoy nga lumad sa Siquijor kansang bunga gihimong kalan-on sa mga Siquihodnon susama’g bili sa bugas sukad pa sa mga katigulangan. 

Kinii motubo ug maayo sa isla ug makaplagan sa tanang kalungsuran basi sa imbentaryo nga gihimo sa provincial Agricultural Technology Coordinating Office (PATCO) ug sa lokal nga buhatan sa agrikultura ning lalawigan. 

Kusganong gidasig ang halapad nga pagpananum niini aron malikayan ang kagutom ug makahatag ug dinugay nga seguridad sa pagkaon. 

Gawas pa, ang pagpananom sa maong kahoy makatabang usab aron mamenosan ang epekto sa climate change kon pagkausab sa klima ug makahatag dugang kapaninguhaan sa mga mag-uuma, sumala pa sa PATCO. (mbcn/RACalibo-PIA Siquijor)