DTI hugot nga ni monitor sa mga mamaligyaay og motor helmet

By Amorganda A. Saludar

CEBU CITY, Jan. 7 (PIA) -- Ang Department of Trade and Industry (DTI) dinhi sa rehiyon mopunting sa ilang pag monitor sa mga mamaligyaay og helmets aron pagsiguro nga magmalampuson ang implementasyon sa Republic Act 10054 o ang Motorcycle Helmet Act. 

Gibutyag ni DTI-7 Regional Director Asteria Caberte nga ilang buhatan nahuman na sa ilang tulamanon sa pagpahimangno sa publiko kabahin sa implementasyon sa maong balaod sugod karong buwana. 

Gawas sa pagpakatap og mga kasayuran, aduna usa’y gipahigayon nga inspeksyon sa mga helmet kung aduna ba kini tatak nga sticker sa Import Commodity Clearance (ICC) o ang Product Standard (PS). 

Ang mga ICC stickers alang niadtong mga helmet nga ginama sa laing nasud samtang kadtong PS stickers alang niadtong mga helmets nga ginama dinhi sa nasud. 

Sukad niadtong Hunyo sa miaging tuig, ang DTI nipahigayon na og inspeksyon ug pagpangtaod og sticker ang ilang sangang buhatan lukob nasud ug kini libre alang niadtong mga tag-iya og helmet sa motorsiklo. 

Nagkanayon si Caberte nga sa pagkakaron ila na nga kanunay ang pagtino kung ang mga mamaligyaay og helemet nagbaligya na ba niadtong adunay ICC ug PS stickers sigon sa kamanduan ubos sa RA 10054. 

Subay niini kadtong mopalit og mga helmet sa motorsiklo makasiguro na nga kini nahasubay gayod sa gilatad nga kalidad ug porma kung kini gipalit sa na inspeksyon na nga mga mamaligyaay. 

Gisiguro ni Caberte nga bisan pa og ang pagpangdakop dili na parte sa trabaho sa DTI sila mo asister gihapon kung may kalambigitan na sa kalehitimo sa mga stickers. 

Dugang pa niya nga ang ilang ahensya adunay pamaagi sa pag-ila kung ang sticker gipeke ba o wala. 

Ang silot nga multa og P10, 000 ipahamtang niadtong masakpan nga nigamit og peke nga sticker. 

Apan si Caberete nipahimangno ngadto sa mga tigpatuman sa balaod nga nga kini nga lakang ang pinakaulahi nga prayoridad sa pagpatuman sa Motorcycle Helmet Law. 

Sugyot niya ngadto sa mga tigpatuman sa baload nga alang sa sayon implemetasyon kung makita gani ang ICC o PS sticker ug ang gisul-ob nga helmet nitabon sa dunggan angay kini nga palabyon diha sa kadalan. 

Sa unang adlaw sa implementasyon, ang Land Transportation nitaho nga adunay nasakpan nga 67 ka mga nakalapas sa Motorcycle Helmet dinhi sa siyudad sa Sugbo. (AYS/PIA-7, Cebu)