Mga barangays sa Ayungon, NegOr makapahimulos sa KALAHI-CIDSS

By Amorganda A. Saludar

DUMAGUETE CITY, Jan. 9 (PIA) -- Duha ka mga barangay sa Ayungon, Negros Oriental ug dul-an 600 ka mga panimalay nga mga mag-uuma matugyanan na unya sa farm-to-market road (FMR) nga mga proyekto pinaagi sa Kapit Bisig Laban sa Kahirapan-Comprehensive and Integrated Development Social Services o KALAHI-CIDSS nga programa sa kagamhanan. 

Barangays Amdos ug Manogtong sa Ayungon makapahimulos sa nahisgutan nga proyekto. 

Ang komunidad sa Amdos nakadawat og ayuda nga mokabat ngadto sa P3.2 milyones gikan sa Department of Social Welfare and Development (DSWD) Kalahi-CIDSS alang sa konstruksyon ug pagpalmbo sa 1.8 kilometro nga farm-to-market road. 

Ang barangay Manogtong sa laing bahin nakadawat og kapin P1.9 milyones alang sa pag konkreto sa 1.1 kilometro nga kalsada sa barangay nga pahimuslan sa kapin 279 ka mga residente sa dapit.

Matud pa ni community facilitator Emeterio Catipay nga ang farm-to-market roads maghatag sa mga mag-uuma og mubo nga rota sa pagbiyahe sa ilang mga produkto sama sa saging, mais, mangga, lubi, tubo ug mga utanon ngadto sa kamerkadohan. 

"Kini maghatag og kahigayonan sa mga mag-uuma nga makadaginot og panahon, salapi ug kahago," si Catipay miingon. 

Dugang pa ni Catibay laing mga proyekto ang ipatuman sa lungsod sa Ayungon nga maglakip sa katokuran sa 30 linear meter of foot-bridge alang sa mga magtutungha sa elementary ug highschool sa mga cluster barangay sa Tampocon ug Gumentoc. 

Apil usab niini ang water system sa kapin 265 ka mga panimalay ug ang haduol niini nga duha ka tunghaan sa elementary sa barangay Atabay ug Kilaban. 

Ang proyekto nga Kalahi-Cidss nagtanyag usab og katokuran sa flood control sa Ilaya River nga nagkantidad og P2.7 milyones alang sa 417 ka mga panimalay sa Poblacion. 

Ang KALAHI-CIDSS nag-unang programa sa kagamhanan batok sa kakabus. Usa kini ka proyeto nga gipunting alang sa pagpalambo sa komunidad nga gipatuman sa DSWD, uban sa ayudang pinansyal gikan sa World Bank (WB). (mbcn/AYS/PIA-7)