'Farm Tourism' gidasig sa Siquijor

By Rizalie A. Calibo

SIQUIJOR, Jan 20 (PIA) -- Usa ka magpapatigayon ug organic farming practitioner sa Negros Occidental kusganong midasig karon sa 'farm tourism' sa Siquijor. 

“Adunay dakong katakus ang Siquijor alang sa turismo apan sa kasamtangan dili kini food-sufficient,” sumala pa ni Ramon Peñalosa samtang iyang gipasabot nga ang probinsya, susama sa ubang mga isla sa nasud, wala migamit sa gitawag ug "island-economy concept" diin ang katakus sa maaong lugar ug sa iyang katawhan hingpit nga mapuslan. 

Dili kinahanglan ang Siquijor mamahimong "food-importing island," matud pa niya uban sa pag-ila sa katakus sa probinisya ug sa lumulupyo sa matang sa agrikultura ilabi nga maoy modala ngadto sa organic farming. 

Uban sa paghatag ehemplo sa iyang 300 ka metro kuadradong "micromodel farm of integrated natural farming" nga patigayon sa Victorias City sa Negros Occidental, si Peñalosa kiingon adunay salapi sa organic farming. 

“Hindi na uso ang conventional farming, dapat organic farming na,” sumala pa niya. Dugang pa niya nga ang natural nga pamaagi sa panguma usa na ka “irreversible trend globally” ug nahimo nang usa ka $90 billion industry. 

Iya usab gidasig ang mga mag-uuma sa dili lamang pagkuntento isip usa ka ordinaryong mag-uuma kondili mamahimong "agripreneur" ug mohimo sa “integrated farming system” kansa mikita ug milyones ka pesos base sa mga “income generating projects” nga iyang gitawag ug “money machines” nga iya mismong kihimo sa iyang luna kon micro-model farm. 

“You can do more for Siquijor,” (Daghan pa kamong mahimo sa Siquijor) matud niya ngadto sa grupo sa mga mag-uuma, agriculturists ug organic farm advocates nga mibisita sa iyang uma sa Victorias City ug sa lungsod sa Manapla sa Negros Occidental. 

Dugang pa ni Peñalosa, ang mga turista moanha sa usa ka lugar alang sa dugang kahibalo, negosyo ug kasinatian. Kon ang Siquijor makahatag niini, ang turismo sa Siquijor molambo ug mamahimong unang kapanginabuhian sa katawhan sa isla sa sunod lima ka tuig. 

“The formula is: productivity plus creativity equals tourism,” sumala pa niya. 

Samtang iyang gipaambit sa grupo ang iyang kahibalo ug kasinatian, iya usab silang gihagit sa pag-ambit uban kaniya sa mga mosunod nga adbokasiya: “Walang Pilipinong dapat magutom sa sariling bayan," "there is no unproductive soil, only unproductive farmer”; "there is money in the countryside"; ug "the farmer who does not know how to pray is not a good farmer. (FCR/RAC-PIA 7, Siquijor)