DSWD-7 nipasalamat sa mga tigbalita dinhi sa rehiyon

By Amorganda A. Saludar

CEBU CITY, Enero 14 (PIA) -- Nagpasalamat sa mga sakop sa media dinhi sa Central Visayas ang Department of Social Welfare and Development (DSWD-7) regional director Ma. Evelyn Macapobre ug dako ang iyang pagdayeg kanila . 

Si Macapobre nipasalamat sa media gumikan sa ilang inasyatibo sa paghatod ngadto sa publiko pinaagi sa ilang pagpakatap sa kasayuran kabahin sa mga programa ug serbisyo sa DSWD dinhi sa rehiyon. 

Gibutyag niya nga sa tanan nga mga katuigan nga nanglabay ang mga tigbalita nahimong dakong hinungdan sa malampuson nga implementasyon ug pagpasupot sa mga serbisyo ug programa sa rehiyonal nga buhatan sa DSWD. 

Matud pa ni Macapobre nga ang mga tigbalita nag abag sa ilang buhatan sa pagtubag sa mga pangutana sa publiko hilabi na kabahin sa mga nag-unang programa sa DSWD sama sa Pantawid Pamilyang Pilipino Program, Kapit Bisig Laban sa Kahirapan-Comprehensive and Integrated Delivery of Social Services (Kalahi-CIDSS), Sustainable Livelihood Program (SLP) u gang National Household Targeting System for Poverty Reduction (NHTS-PR 

Dugang pa niya nga ang media nag-unang kaalyado sa DSWD sa ilang mga lakang alang sa kalambuan ug sa gamay nga mga kahigayonan nga napukaw sa media ang atensyon sa DSWD nakatabang kini sa ahensya pagpausbaw ug pagpalambo sa ilang mga serbisyo ug programa. 

Nanghinaut si Macapobre nga ang lig-on ug hugot nga suporta sa mga tigbalita magpadayon uban na sa mosunod nga regional director. 

Si Macapobre ibalhin na didto sa DSWD-6 o sa Western Visayas ug ihulip kaniya mao si Director Mercedita P. Jabagat gikan DSWD-Caraga sugod karong Enero 11, 2013. (mbcn/AYS/PIA-7)