PCOO miagni sa media nga mahimong kaalyado sa gobyerno

By Amorganda A. Saludar

CEBU CITY, Dec 14 (PIA) -- Si Presidential Communications Operations Office Sec Herminio “Sonny" Coloma" miagni sa mga sakop sa media nga mamahimong kaabag sa kagamhanan alang sa kalambuan. 

Si Coloma nagpadayag sa iyang pag aghat sa mga miyembro sa media dinhi sa nasud nga motabang sa gobyerno sa pagpausbaw sa maayong mga kasayoran alang sa kalambuan. 

Dugang pa niya ang media maoy maayo nga kaabag sa gobyerno sa pagtuman sa mga prinsipyo, ug mga tumong sa pagsubay sa “Matuwid na Daan.” 

Gipadayag usab niya nga sa tanan nga mga pampubliko nga mga hitabo si Presidente Aquino kanunay gayud nga gisiguro nga adunay komunikasyon tali niya ug sa mga sakop sa media sanglit dako gayud ang iyang pagsalig sa kapabilidad sa media isip kaalyado sa kagamhanan alang sa kalambuan. 

Ang kalihim usab nagtuo sa kakayahan sa networking aron pagkab-ot sa kalambuan sa nasud samtang siya nag-aghat nga ipadayon ang networking sa tanan nga mga sektor. 

Matud pa niya nga sa nanglabay nga mga katuigan wala pa nakita ang mga national government agencies nagmugna ug ilang kaugalingon nga website. 

Dugang pa ni Coloma nga bisan sa Malacanang, ang Presidente nagtuboy na sa networking ug katin-awan sa mga kasayoran ngadto sa publiko ug ngadto sa media. 

Ug nga subay niini matud pa niya nga gihimo na ang tanan nga gipangayo sa Bill nga Freedom of Information ug nga matud pa ang Presidente nisanong ug andam nga magtukod ug kaugalingon nga bersyon sa FOI sa Malacanan. 

Kini ang gibutyag sa kalihim atol sa bag-ohay lang gipahigayon nga panapos tuig nga panagtapok sa mga information officers gikan sa rehiyon 6 ug 7 nga gipangulohan sa Philippine Information Agency sa mga naasoy nga rehiyon nga nagdala sa tema nga “Realizing the Matuwid na Daan through Responsible Social Networking.” (mbcn/AYS-PIA7 Cebu)

============

San Pedro Calungsod usa ka maayong modelo sa mga Filipinos

By Amorganda A. Saludar

CEBU CITY, Dec 14 (PIA) -- Si Presidente Benigno Aquino III nagkanayon nga ang kinabuhi ug pagkasantos ni Calungsod nagpadayag sa garbo sa mga Filipino ug dakong pasalamat ug pagsalig sa tinuohan nga Katoliko ug ngadto sa Ginoo. 

Ang Presidente atol sa gipahigayon nga National Thanksgiving Mass alang ni San Pedro Calungsod sa SRP Cebu miingon nga ang balaan nga batan-on usa gayud ka matuod nga Filipino nga naggikan sa mga kaliwat nga mga bisaya dinhi sa Sugbo. 

Dugang pa sa Presidente nga angayan nga magpasalamat ang mga Filipino ngadto sa Ginoo sa nahimong kanonisasyon sa ikaduhang Filipino nga Santo kinsa nagsilbi nga modelo sa mga batan-ong Filipino. 

Gipadayag usab niini nga si San Pedro naghulagway sa pamatasan sa usa ka Bisaya nga angayang panaminan sa mga Filipino sa tanang aspeto sa kinabuhi sa tawo hilabi na sa pagpakiglambigit sa uban nga mga tawo, sa mga minahal sa kinabuhi ug ang pagtoo ug pagsalig sa Ginoo. 

Dugang pa sa Presidente nga si San Pedro nagsalamin sa kaboutan sa mga taga Visayas uga nga ang panagtigum alang sa National Thanksgiving Mass nagpadayag sa testamento sa pagkabukas sa kaugalingon ngadto sa isigkatawo hilabi na gayud ngadto sa kahitas-an. 

Atubangan sa mokabat ngadto sa usa ka milyon ka mga katawhan nga nitambong sa National Thanksgiving alang sa Bisaya nga Santo gipadayag sa Presidente ang hagit sa paghiusa og sa paghimo sa papel sa matag usa alang sa kaayohan. 

Samtang siya nanghinaut usab nga magsilbi unta nga giya sa matag usa ang kinabuhi sa Santo. 

Ang Bisaya nga Santo nga sa San Pedro Calungsod gikanonisar didto sa Roma dungan sa lain unom ka mga Santos niadtong miaging Oktobre 21 diin ang National Thanksgiving Mass giselebrar dinhi sa Sugbo niadtong milabay nga Nobyimbre 29, 2012. 

Sa wala pa nakanonisar ang Bisaya nga Santo nga San Pedro Calungsod laing Filipino nga Santo nga si San Lorenzo Ruiz de Manila gideklarar usab nga Santo sa Simbahang Romano Katoliko. (mbcn/AYS-PIA7 Cebu)

============

Pag-IBIG Fund mosaulog sa ika-32 nilang anibersaryo ugma

By Juju Manubag-Empuerto

CEBU CITY, Dis 13 (PIA) -- Ang Home Development Mutual Fund kon Pag-IBIG Fund nagsaulog sa ika-32 nga anibersaryo inig ka Disyembre 14. 

Mao kini ang gipahibalo ni Victoria dela Peña, ang bise-presidente sa Pag-IBIG Fund Visayas Group sa Kapihan sa PIA nga gipahigayon niadtong Disiembre 12 sa ilang opisina. 

Si dela Pena miingon nga ika-32 nga anibersaryo pagasaulogon sa tibuok nasod ug dinhi usab sa Cebu nga pagasugdan kini ug usa ka Misa. 

Gipahibalo usab ni dela Peña nga gisubhan ang ilang anibersaryo niadtong Disyembre 7 sa pagtigom sa labing una nga Fund Coordinators Club (FCC)’s nga naatol usab sa ika-25 nga anibersaryo niini. 

Sa samang kalamboan, ang Pag-IBIG Fund sa Cebu North ug Cebu South nga mga sangay mihatag ug pasidungog sa 19 ka mga kagamhanang lokal, ahensiya sa gobyerno ug mga pribadong kumpanya nga nakatabang sa pagpatuman sa nagkadaiya nga mga programa sa Pag-ibig. 

Ang mga gipasidunggan mao ang siyudad sa Bogo, Danao, Mandaue, Cebu, Naga, Carcar, Talisay, lungsod sa Liloan, Minglanilla, Cordova, Cebu Mayor Michael L. Rama, Mandaue City Welfare Services, Bogo City Local Civil Registrar, Cebu Mitsumi Inc, Philippine Economic Zone Authority (PEZA), Carmen Copper Corporation (CCC), Overseas Workers Welfare Administration (OWWA), Philippine Overseas Employment Administration (POEA) ug ang Philiipine Information Agency (PIA). 

Sa unang higayon, ang Pag-IBIG Fund Cebu isip paghatag ug pasalamat sa ilang media partners mihatag usab ug pasidungog ug pahalipay sa ilang kanunayong suporta.(mbcn/JSME-PIA7 Cebu)

============

Inspecksyon sa mga pabrika sa pabuto sa Lapulapu gilusadKini aron paglikay sa aksidente nga sagad mahitabo sa bulan sa Disyembre

By Ferliza C. Contratista

CEBU CITY, Dec 14 (PIA) -- Ang Lapulapu City government mipahigayon og sagonson og kinalit nga inspeksyon sa mga pabrika sa pabuto sa dakbayan aron makasiguro sa kaluwasan niini. 

Karon nga nag angat na ang Pasko, Si Lapulapu City Mayor Paz Radaza mihatag og kamandoan sa mga opisyales ilabi na ang mga taga Bureau of Fire and Protection sa paglusad og sagonson nga inspeksyon sa mga pabrika sa paboto didto sa barangay Babag. 

Ang dakbayan sa Lapulapu nailhan na nga “Firecracker Capital of Cebu”, diin ang industriya sa pagpamuhat og pabuto anaa na sa kultura sa mga Oponganon. 

Mihatag si Radaza sa maong mando tungod kay sa bulan sa Disyembre sagad mahitabo ang mga aksidente sa mga pabrika, labina kadtong mga anaa lamang managhimo sa ilang tagsa-tagsa ka mga kabalayan. 

Giawhag ni Radaza nga angayan nga mag operate nga legal ang mga mamuhatay og pabuto dili lang sa paglikay nga dakpon apan aron makapahimulos sa mga nagkadaiyang mga trainings og workshops nga ihatag onya sa panggamhanan. 

“We are focusing on measures that will prevent these accidents,” Radaza said. (Atong gitutokan ang mga medyos alang sa pagtino nga walay aksidente nga mahitabo) 

Tanyag sa Mayor nga anam-anamon pagkat-on sa mga operator o tag-iya sa mga pabrika sa pabuto ang “modern art and science of pyrotechnic”, usa ka bag-ong teknolohiya nga mas luwas kanila og sa mga konsumidor. 

Sa laing bahin ang kwerpo sa kapolisan sa dakbayan sa Lapulapu miingon nga mibuhat na sila og pipila ka mga pagtapok tapok sa mga tag-iya og mga trabahante sa pabuto. 

Matod sa kapolisan ila kining gihatagan sila sa mga kalamboan kabahin sa paghimo, pagputos og pag transport sa mga pabuto. 

Sa mga miaging toig pipila ka kinabuhi og propreidad ang nakalas tungod sa mga "unsafe practices" sa pagpamuhat og pabuto, tungod kay sagad niini mga pamilya lang ang nag negosyo. (mbcn/FCC-PIA7 Cebu)

============

P11M Ayoda sa DAR sa mga Mag-uuma sa Sugbo para sa 2013

By Ferliza C. Contratista

CEBU CITY, Dec 14 (PIA)-KAPIN sa P11M ang gitakdang maapod apod sa mga organisasyon sa mga mag-uuma sa lalawigan sa Sugbo sunod tuig. 

Aron pagsiguro nga malamposon ang programa sa agraryong reporma, mi anunsyo ang Department of Agrarian Reform 7, nga ilang gipanghingosgan ang paghatag sa klase klaseng assistance ubos sa Agrarian Reform Community Connectivity and Economic Support Services Program (ARCESS). 

Matod ni Atty. Jonathan Sinco, Assistant Regional Director for Operations, miaprobar na ang DAR og pundo alang sa Sugbo nga mokabat og P11M aron sa pagpalit ug mga nagkadaiyang mga ekipo sa pagpang-uma ug alang sa mga trainings. 

Ang mga tinguha nga maapil sa maong programa mao ang pundo alang sa Enhanced Rice, Vegetable ug Sugarcane Production apil na usab ang Dairy Farming. 

Ang mga logar sa tirsero distrito ang makadawat sa kinadak-ang bahin, mokabat kini og P4.3 milyones. Kini naglambigit sa mga dakbayan sa Toledo ug lungsod sa Pinamungahan ug Asturias. 

Gani si DAR Secretary Virgilio de los Reyes bag-ohay lang nga mibisita sa Asturias para inaugurahan ang maong programa sa nag-unang Agrarian Reform Beneficiary Organization (ARBO) ang Pundok sa mga Mag-uuma (PUMAG). 

Misunod ang 4th District diin makadawat ang dakbayan sa Bogo ug lungsod sa Medellin og P2.5M alang sa pagpalit sa mga tractor. 

Ang lungsod sa Liloan sa kinto distrito makadawat og P2.25M alang sa pagmungtar sa usa ka Milking Park Plant. 

Parehong makadawat sa tag P1.2M ang primero ug segundo Distrito sa Sugbo; apil niini ang dakbayan sa Carcar ug lungsod sa Sibonga, Argao, Ronda ug Moalboal. 

Matod ni Sinco, adunay 2,149 agrarian reform beneficiaries (ARB’s) gikan niining 11 ka lugar sa Sugbo apil na usab ang mga non-ARB’s nga mikabat ngadto sa 1,115. 

Kini sila apil sa mga makapamintaha unya tungod kay membro sila sa mga organisasyon nga mahatagan niining mga ayuda. 

Ang ARCESS usa ka panagtambayayong sa gobyerno, state universities, colleges, komunidad ug mga pribado ug mga publkong organisasyon. 

Gihatagan sa dugang lugway nga lima ka tuig ang CARP tungod kini sa kalisod sa pag implementar sa programa labi na sa matang sa pag-apod apod. Kini nagsugod niadtong 1988. (mbcn/FCC-PIA7 Cebu)