Pag-IBIG misiguro nga walay pagsaka sa tampo sa pagpasakop

By Juju Manubag-Empuerto

CEBU CITY, Dec 18 (PIA) -- Ang labing taas nga opisyal sa Pag-IBIG Fund-Visayas mipasiguro sa 1.2 milyones ka mga miyembro niini nga wala sila'y plano nga mopasaka sa tampo nilang P100 matag bulan tunga sa pagpataas sa SSS ug Philhealth. 

Ang Bise-Presidente sa Pag-IBIG Fund-Visayas nga si Victoria de la Peña mipahibalo niini sa bag-o lang gihimo nga PIA Kapihan diin mi-highlight sa pagsaulog sa ilang ika-32 nga anibersaryo. 

“Bag-ohay ra nga ang SSS ug ang PhilHealth mipasaka sa tampo sa ilang mga miyembro. Apan dili buot nga kunhoran pa sa Pag-IBIG ang ‘net take home pay’ sa mga sakop niini, mao to ang hunta nila nakahukom nga dili pasak-an ang tampo nila,” pagpasayod ni De la Peña. 

Si De la Peña mitino nga wala kini magpasabot nga ang ilang ahensiya dili na gyod mopasaka sa tampo sa mga miyembro niini. Iyang gigarantiya nga walay himoong pagsaka sa tampo sa umaabot nga mga adlaw o tuig. 

Ang Pag-IBIG opisyal mideklarar nga ang Pundo kay usa na ka P300 bilyon nga korporasyon ug ang tinigom sa mga miyembro gidumala pag-ayo. 

“Ang Hunta istrikto kaayo sa pagdumala sa milyones nga mga sakop Pundo sa tibuok nasod. Anaa sa ilang hunahuna nga makahatag sila ug dibidendo sa ‘savings’ sa ilang mga sakop nga ginahimo matag kwarter sa tuig ug ipuno ni namo kada tuig sa mga tampo sa mga mieymbro aron inig mangutang sila, magsige ug kadako ang kantidad sa ilang ma-loan kada tuig,” si De La Peña miingon.

Ang dakong linahap sa kabtanan sa Pundo ginabubo kinalabwan sa programa niining para pagpatukod ug balay kay mao may dakong katuyuan sa ahensiya nga makahatag ug maabot nga kapasilongan sa mga sakop niini. Ang laing mahinungdanon kantidad igahin alang usab sa ‘multi-purpose loan’ (MPL) para sa mga miyembro. 

Sa 1.2 milyones nga mga sakop sa Tunga-Tungang Bisayas , ang Cebu ang may kinadaghanang miyembro nga 733,000. (rmn/JSME-PIA 7, Cebu)