Kanonisasyon ni Calungsod naghatod og hugot nga pagtuo, milagro

By Amorganda A. Saludar

CEBU, Nov. 11 (PIA) --- Mga deboto dinhi sa Sugbo nagtoo nga ang kanonisasyon sa ikaduhang Filipino nga santo nga si San Pedro Calungsod nag-aghat sa mga kabatan-onan pagbag-o sa ilang pagtoo sa simbahang katoliko sumala sa gihulagway sa kinabuhi sa batan-ong santo. 

Si San Pedro Calungsod de Cebu kanhi usa ka sacristan ug misyonaryong katekista kinsa nag antos sa pagpanglutos ug martyrdom gumikan sa iyang hugot nga pagtoo sa Dios. Siya namatay sa edad nga 17. 

Sumala pa ni Mario Baylosis miyembro sa parish pastoral council ug usa usab ka deboto nga ang kanonisasyon ni San Pedro Calungsod nagpukaw ug nag-aghat sa liboang mga deboto sa pagduaw sa ilang parokya. 

Dugang pa ni Baylosis nga ang santo tinud-anay gayod nga nagsilbing sanglitanan sa mga Pilipino hilabi na gayod sa mga kabatan-onan. 

Gipadayag usab niya nga ang nagkataas nga gidaghanon sa mga deboto nga naggikan sa nagka lain-lain nga dapit usa lamang sa mga milagro nga gipakita sa santo ngadto sa mga katawhan. 

Tungod niini nag aghat sa Baylosis sa mga katawhan sa pagsunod sa mga gawi og kamaayo ni San Pedro Calungsod. Kinsa gisakripisyo ang tanan gumikan lamang sa Kristohanong pagtoo. 

Atol sa Oktubre 27 nga episode sa “Pagtuki” ang opisyal nga program sa radyo sa Ramon Aboitiz Foundation Inc. (RAFI) si Divina Cantalejo, deboto ni Calungsod nipaambit sa mga milagro nga iyang nasinati pinaagi sa pangama ug pagpangaliya ni San Pedro Calungsod bisan niadtong beato pa kini. 

Gibutyag ni Cantelajo nagsugod siya sa pagka deboto ni San Pedro Calungsod niadtong beato pa kini. Diin siya nagtuo nga ang iyang pagtuo maoy nakaayo sa iyang balatian. Siya usab nagtuo nga si Pedro Calungsod ang nialim sa sakit nga nervous breakdown sa iyang igsoon nga lalaki. 

Dugang pa ni Cantalejo nga angay unta nga panaminan sa mga batan-on ang kinabuhi sa bisaya nga santo giunsa niya pagpakamatay alang lamang sa pagdapig sa simbahang katoliko ug sa iyang pagtuo sa labawng makakagahum. 

Matud pa niya nga ang mga kabatan-onan musunod unta sa mga gawi ug prinsipyo ni San Pedro Calungsod. Ila usab unta nga gahinan og panahon ang pagserbisyo sa komunidad ug sa simbahan sama sa gihimo ni Calungsod. 

Si Cantalejo usab nagtuo nga ang pagserbisyo sa komunidad adunay dakong papel aron mahilayo ang mga kabatan-onan sa mga bisyo. 

Ang Oktubre 21, espesyal nga adlaw sa mga Pilipino labi na sa mga batan-on kinsa nihangop sa bag-ong Plilipino nga santos. Ang bisaya nga santo si San Pedro Calungsod nga nakanonisar didto sa Roma uban sa laing unom ka mga santos. 

Sa wala pa si San Pedro Calungsod laing Pilipinong santos ang nakanonisar si San Lorenzo Ruiz de Manila gideklarar usab nga santos sa simbahang Katoliko Romano. (mbcn/AYS-PIA7, Cebu/ RAFI)