Kapin dos mil nga mga SSS miyembro ang nakapahimulos sa SSS Loan Condonation Program sa dakbayan

By Juju Manubag-Empuerto

CEBU CITY, Sept 17 (PIA) -– Kapin sa dos mil ka mga miyembro sa Social Security System (SSS) ang nakapahimulos na sa nagpadayon nga programa sa SSS nga Condonation Loan Program (CLP) nga motapos karong Setyembre 28. 

Mao kini ang gipahibalo ni Mario Corro, ang manager sa SSS Cebu Branch sa panagtigom nga gihimo sa rehiyonal nga buhatan sa PIA-7 karong buntag. 

Matod pa ni Corro nga ang kapin dos mil nga nanghulam kanila, nakapahimulos sa programa sa SSS ‘Member Loan Penalty Condonation Program’ wala gani makaabot sa P80 milyones. 

Ang opisyal sa SSS mi-aghat sa tanang utangan tungod sa duol na ang Setyembre 28, ang awahing adlaw sa pagpanawat sa aplikasyon alang sa CLP nga mopahimulos sa talagsaon nga higayon. 

Kadtong dili magtagad ug magbakana sa mao nga higayon mosangpot sa walay makuhang benepisyo sa SSS retirement, disability ug death sa kaulahian kay ihapak man ang tubo ug silot ngadto sa benepisyo nga kahimuslan unta. 

“Mag-atubang gyod sila pagkadagkong penalty nga maglisod na unya sila pagbayad,” matod sa opisyal. 

Sa laing bahin, si Janice Caballes hepe sa Operations Accounting Section sa SSS Cebu misulti nga may upat ka sitwasyon ang mga nangutang sa SSS nga mahimong mopahimulos sa CLP. 

Ang una, mao kadtong makadawat ug 100 porsiyento nga pag-kondonar sa silot sa ilang utang tungod patay na kini ug ang ikaduha kadtong wala gi-remit ang ilang employer sa ilang bayad. 

Ang ikatulo nga sitwasyon kay mahimong makondonar ang silot sa ilang utang hangtod 90 porsiyento ug bayaran ug hurot ilang loan ug 80 porsiyento kon i-installment kini sa pagbayad ug adto na sa Nobyembre ang pirmerong hulogan, sumala ni Caballes. 

Samtang kadtong dunay disability claims, 50 porsyento sa silot sa loan ang mahimong ikondonar. 

Si Corro miingon nga mahimong bayaran ang loan ug installment hangtod sa tulo ka tuig. 

Dugang ni Corro nga kadtong buot mopahimulos sa 80 hangtod 100 porsiyento nga pagkondonar sa silot sa ilang loan kinahanglan nga nakahatag ug tulo ka bulan nga tampo ug amortisasyon sa awahing unom ka bulan sa pag-apply sa CLP. 

Si Caballes mipahibalo nga usa ka porsiyento matag bulan ang ginapahamtong nga silot ngadto sa balanse. 

Ang ikondonar sa SSS mao ang kon penalty sa loan, panapos ni Corro. 

Alang sa dugang kasayoran, mahimong motawag sa buhatan sa SSS Cebu Branch sa mga numero sa telepono nga 5059301 hangtod 5059310. 

Mahimo pud sila makab-ot sa www.sss.gov.ph. (JSME-PIA7, Cebu). 

============

Gipalapdan sa SSS ang pagpasakop sa mga mamumuo sa impormal sektor

By Juju Manubag-Empuerto

CEBU CITY, Sept 17 (PIA) –- Gipalapdan sa Social Security System (SSS) ang pagpasakop sa mga mamumuo sa impormal sektor pinaagi sa AlkanSSSya. 

Sumala pa ni Janice Caballes, ang hepe sa Accounts & Monitoring Section sa SSS Cebu Branch sa panagtigom nga gihimo sa rehiyonal nga buhatan sa PIA-7 sa pag-awhag sa mga mamumuo sa impormal sektor sama sa mga drayber sa traysikad, motorsiklo, habalhabal, tindera sa mga palengke, sa aseras ug kadtong anaa sa direct selling nga mopasakop sa SSS. 

Ang programang AlkanSSSya nagdasig sa impormal sektor nga magpa-rehistro ug ipa-active ang pagkasakop sa ilang kapunongan tungod ipaagi sa "microsavings" ang ilang tampo nga bayad nga P10.00 kada adlaw hangtod moabot kini ug P312 sulod sa usa ka bulan. 

Matod pa sa SSS Cebu Branch Manger nga si Mario Corro nga ang pagsakop sa mga mamumuo sa imporkal nga sektor sa SSS kay mahisama sila sa mga mamumuo sa pribadong sektor nga makaangkon sa samang benepisyo sa claims sa maternity, disability, retirement ug death. 

Dinhi sa Sugbo, wala pay nakapahimulos sa AlkanSSSya apan karong Biyernes, Setyembre 14, ang SSS Cebu anaa sa siyudad sa Carcar alang sa usa ka "coverage drive" nga magsugod ug alas 9 sa buntag hangtod sa alas 4 sa hapon sa tinguha niining masakop ang daghang mga tricycle drayber didto. 

Gipahibalo ni Caballes nga katorse nga sakop iya kuyog nga magdumala sa information booth nga ipahimutang didto sa Carcar City Hall. 

Matod pa opisyal, kadtong gustong masakop sa SSS diha sa Carcar ug sa mga silingang lungsod mahimong moadto karong Biyernes. 

Mag-andam lang sila i ug birth o baptismal certificate, married certificate, barangay certificate nga nag-ingon sa ilang gikuhaan sa ilang kita ug ang kantidad nga P312 nga unang tampo. 

Dugang ni Caballes, mo-abiabi usab sila ug may mga pangutana kabahin sa estado sa ilang membership, loans, remittance, claims ug mo-sumiter ug aplikasyon sa Condonation Loan Program (CLP). 

Didto sa kaulohan may 34 na ka mga organisasyon nga nipresentar sa kapin 18,600 nga mamumuo sa impormal sekto, matod pa. 

Karong bulan sa Setyembre, gisaulog sa SSS ang ika-55 ka tuig nga anibersaryo ug ang tema mao ang “sa SSS, Kinabukasang Pinagsikapan, Seguridad Maasahan”. 

Gipadayag sa SSS ang ka-importante ang regular nga pagtigom sa kita sa mamumuo aron makab-ot ang seguro ug hayag nga kaugmaon alang kaniya ug sa iyang pamily. (FCR/JSME-PIA7, Cebu).