RDC-7 mohatod na sa hinabang alang sa mga biktima sa baha sa dili pa motapos ang buwan

By Amorganda A. Saludar

CEBU CITY, Aug 31 (PIA) --Ang gimugna sa Regional Disaster Council (RDC) -7 nga Task Force ‘Tabang’ (TFT) alang sa mga biktima sa Habagat didto sa Luzon nag target nga sa dili pa motapos ang buwan sa Agosto ila na nga mahatod ang kinolekta niini nga relief items ngadto sa mga biktima sa grabeng pagbaha didto sa Luzon. 

Atol sa gipahigayon nga Kapihan sa PIA dili pa lang dugay nagakanayon si Timogen Arellano sa National Economic and Development Authority (NEDA) 7 nga sa pagka karon padayon pa gihapon sila sa pagpanawat og donasyon in cash ug in kind gikan sa publiko ug sa mga miyembro sa RDC 7 aron kini maputos isip relief items along ngadto sa Luzon. 

Dugang pa ni Arellano nga ang TFT naumol niadto lamang niaging semana ug sila gitagaan og panahon sa pagkolekta og relief goods sa dili pa kini ibyahe ngadto sa Luzon. Ang NEDA 7 maoy nagsilbi nga secretariat sa RDC 7. 

Sa makausa pa niapelar si Arellano sa publiko sa paghatag og gahin kung unsa ang naa sila ngadto sa sa mga naalaot nga katawhan sa Metro Manila ug mga silingan nga dapit nga apektado sa baha ug walay hunong nga pag-ulan. 

Sumala pa niya nga mismo si RDC 7 Chairman Cebu City Mayor Mike Rama nipadala og representante ngadto sa Manila aron pagdeterminar sa mga dinalian nga panginahanglanon sa mga biktima sa baha sa mga apektado nga lugar. 

Lakip sa mga gikinahanglan nga sa mga biktima sa baha mao ang bottled water, ready-to-eat food items, choco bars, tetra pack milk alang sa mga bata, tualya nga magamit isip habol ug mga ginamit nga mga sinina. 

Ang mga drop-off centers naglakip sa regional office sa Department of Social Welfare and Development 7 nga abli 24/7, Provincial Capitol, Talisay ug Lapulapu City Hall, ingon man tanan nga mga police stations sa Central Visayas ug Cebu Chamber of Commerce and Industry. (FCR/AYS-PIA7 Cebu)