Pledge 25 program sa Philippine Red Cross gilusad alang sa dugang donasyon ug dugo

By Rizalie A. Calibo

SIQUIJOR, Aug 25 (PIA)-- Gilusad sa Philippine Red Cross (PRC) ang Pledge 25 Program nga mosuporta sa ilang panawagan sa dugang donasyon sa dugo, sumala pa ni PRC administrator Rowena Maputi. 

Ang maong programa, matud ni Maputi gilusad niadtong Hulyo atol sa selebrasyon sa blood donor month. Kini usa ka programa sa Red Cross Youth nga nagdani sa mga kabataan gapangedaron ug 18 ngadto sa 25 anyos alang sa regular nga pagdonar ug dugo alang sa probinsya. 

Sumala pa niya, usa kini sa kaakohan ug dili angay kahadlokan ang pagdonar ug dugo samtang iyang gitagsatagsa ang mga benepisyo nga makuha sa usa ka donor. 

Usa sa mga benepisyo mao ang pagbag-o sa dugo nga naglatay sa kalawasa. Pinaagi sa himoong test sa dugo mahibaw-an usab ang sakit sama sa Hepatitis B. C HIV, Malaria ug syphilis. 

Gawas pa niini, ang usa ka donor usab makadawat ug donor card nga iyang magamit panahon sa emerhensiya. 

Ang Red Cross maoy tulay sa nanginahanglan ug tighatag. Kini kabahin sa pagtabang sa katawhan. Kon wala ang katawhan nga motabang, wala usab mahimo ang Red Cross, sumala pa ni Maputi samtang iyang giawhag ang suporta alang sa mga programa sa Red Cross. 

Ang mga interesadong modonar bukas nga mobisita sa sa opisina sa Red Cross matag Lunes hangtud Biyernes sa Caridad Street, Poblacion, Siquijor, Siquijor. (mbcn/RAC/PIA-Siquijor) 

==============

DOST mihatag ug pundo alang sa pagpauswag sa makinarya, ekipo sa SME Siquijor

By Rizalie A. Calibo

SIQUIJOR, Aug 25 (PIA) -- Lain na usab nga magpapatigayon ang nahatagan ug pondo gikan sa Department of Science and Technology sa Rehiyon 7. 

Kini alang sa makinarya ug ekipo sa Lyn and Sam Welding Work and Machine sa Catulayan San Juan, Siquijor nga giaparobahan sa DOST dili pa lamang dugay. 

Sumala ni DOST-Provincial Director Mario de la Pena ang Lyn and Sam Welding Work and Machine nga gipanag-iya sa magtiayon nga Sam ug Lenie Tubal mao ang benepisyaryo sa proyekto nga ginganlan ug “Machinery and Equipment Upgrading of Lyn & Sam Welding Work and Machine in Catulayan, San Juan, Siquijor” ubos sa Small Enterprise Technology Upgrading Program (SET-UP). 

Matud pa niya ang proyekto nagtumong pagpauswag sa kapabilidad sa maong machine shop pinaagi sa pagamit ug bag-ong kagamitan kon lathe machine aron usab mouswag ang serbisyo niini sa matang sa produksyon sa mini corn mill ug uban pang metal based products. 

Gilantaw nga pinaagi sa Lathe Machine mosaka usab ang kalidad sa produkto ug gidaghanon niini sa 50 porsyento base a 2011 nga kita. 

Ang DOST misiguro nga ang pondo gikan sa DOST/SET-UP maggamit pag-angkon sa mga bag-ong kagamitan ug materyales alang sa pagpauswag sa serbisyo. 

Ang pondo nga mikantidad ug P374,400 gihatag ngadto sa Lyn and Sam Welding Work and Machine sa DOST/SETUP aron mapasayon ang pagpalit sa tanang mga materyales ug kagamitan.

Ang opisina usab molantaw ug mosiguro sa maayong implementasyon sa maong proyekto base sa gihimong skedyul niini. 

Ang Lyn and Sam Welding Work and Machine, usab mosiguro nga ang pondo gamiton dili sa ubang paagi o investment kon dili sumala sa Memorandum of Agreement nga gilagdaan sa DOST ug sa benepisyaryo. 

Si de la Pena usab miingon nga ang benepisyaryo kinahangalan responsable sa inadlawng operasyon niini ug sa kalamboan sa maong patigayon. 

Ang SETUP usa ka programa ubos sa National Science & Technology (S&T)Plan nga mihatag ug hinabang pinansyal sa nagkalain-laing proyektong patigayon sa mga probinsya, dugang pa ni de la Pena said. (mbcn/RAC/PIA-Siquijor)