Cebu Guv nag-aghat sa mga LGUs pagsagop sa purok system

By Amorganda A. Saludar

CEBU CITY, Aug 17 (PIA) -- Ang legasiya sa pagpatuman sa “purok system” isip maayong lakang sa pangagamhanan gilauman ni Governor Gwen Garcia nga mapadayon unya sa mosunod nga liderato sa Kapitolyo. 

Nagkanayon si Garcia sa usa ka press conference dili pa lang dugay nga ang maayo nga stratehiya sa pangagamhanan naglambigit gihapon sa komunidad ngadto na sa pinakaubos nga lebel niini ug nga gusto sa gobernadora nga masagop lahios na ngadto sa mga purok units sa tanan nga siyudad ug mga lungsod sa probinsya sa Sugbo. 

Dugang pa niya nga ang purok system labaw pa sa personalidad ug administrasyon gumikan kay ang tanan ni kooperar ug nitabang aron paghatod og kausbawan sa Sugbo. 

Nahimo nga kaabag sa probinsyal nga kagamhanan sa Sugbo niini nga adbokasiya ang Ramon Aboitiz Foundation, Inc. (RAFI). 

Kahinumdoman nga niadtong tuig 2008 ang RAFI u gang Cebu Provincial Government nilagda og memorandum of agreement alang sa eGWEN (Green and Wholesome Environment that Nurtures) Our Cebu Program nga gitumong alang sa pagpausbaw sa Sugbo lakip na dinhi cleanliness, health, sanitation, environment, culture ingon man heritage promotion, ug ang bag-ohay lang nga napuno nga criteria sa straktura ug sistema sa pangagamhanan. 

Matud pa ni Garcia nga ang promosyon sa purok gipaila na ngadto sa local government units sa eGWEN Program apan limitado lamang alang sa mga siyudad ug munisipyo. 

Ubos niini nga programa nga gisugdan upat na ka tuig ang nakalabay, ang mga siyudad ug munisipyo gimanduan sa pagpatuman sa mga programa subay sa mga katuyoan eGWEN ug gradohan sa mga evaluators gikan sa Kapitolyo. 

Ang mga local government units nga adunay gipakita nga maayong performance tagaan ug pasidungog ingon man cash incentives gikan sa Capitol matag Agosto isip kabahin sa kasuologan sa anibersaryo sa probinsya matag Agosto 6. (FCR/AYS-PIA7 Cebu)

=============

Kahugpongan sa media naghiusa para ipasar ang FOI Act

By Amorganda A. Saludar

CEBU CITY, Aug 17 (PIA) -- Pipila ka mga kahugpongan sa media ug mga editors sa tibuok nasud naghiusa sa pagduso sa dinalian nga pagpasar sa Freedom of Information (FOI) Act. 

Ang Philippine Press Institute (PPI), Kapisanan ng mga Brodkaster ng Pilipinas (KBP) ingon man ang Right to Know, Right Now! Coalition nakadesider paghimo sa Agosto 15 isip "FOI Day" agig paghatag og emphasis sa kabililhon sa naasoy nga balaod. 

Ang maong kalihukan nagsilbi usab nga sinugdanan sa plano sa mga organisasyon agi’g pag obserbar sa Agosto 19 isip ika 1,000 ka adlaw human sa Maguindanao massacre niadtong Noyembre 2009 samtang parte sa mao gihapon nga kalihukan nianang adlawa ang evening vigil-prayer rally sa Bantayog ng Mga Bayani. 

Ang mga nagkalain-lain nga organisasyon nga parte sa naasoy nga kalihukan dili pa lang dugay aduna’y tino nga tahas ug papel alang sa katumanan ug kalampusan sa maong kalihukan. 

Ang mga miyembro sa PPI gitahasan sa publikar ug pag upload sa pooled editorial (English ug Bisaya) samtang ang KBP sa ilang bahin gisangonan sa paggama og public service advocacy plug alang sa radio broadcast ug ang ilang mga miyembro nga estasyon naka schedule sa pagpagawas sa kahanginan sa maong plug sugod Agosto 17. 

Uban pa nga mga online media agencies nipadayag sa ilang tinguha pag upload sa pooled editorial samtang ang mga citizen journalists nipasalig usab pag post ug pagpakatap niini sa Facebook, Twitter ug sa uban pa nga social media networks. 

Ang National Union of Journalists of the Philippines nihimo usab og hut-ong sa press corps sa mga major beats niadtong adlaawng Miyerkules ug Huwebes ug ang ilang mga miyembro nagsugod sa pagsul-ob og "Right to Information, Right Now!" button pins sa ilang mga trabahoan. (FCR/AYS-PIA7 Cebu with PCIJ PR)