Adbokasiya sa organic agriculture gihingusgan sa Siquijor

By Rizalie A. Calibo

SIQUIJOR, Aug 16 (PIA) -- Mihimo ang Provincial Organic Agriculture Board ug ang Provincial Technical Working Group sa ilang kusganonong adbokasiya sa organic agriculture ngadto sa kalungsuran ug kabalangayan sa lalawigan sa Siquijor human kini gihangop sa lalawigan Republic Act 10068 kon Organic Agriculture niadtong Abril ning tuiga. 

Sunod-sunod nga information caravan ang gihimo niadtong miaging semana tulo ka mga tunghaan ug lain pang tulo ka lokal nga kagamhanan sa San Juan, Siquijor ug Enrique Villanueva. 

Susamang information caravan usab gihimo sa lain pang tulo ka lungsod ug tunghaan sa Larena, Maria ug Lazi niadtong bulan sa Hunyo ug Hulyo. 

Ang infocar mitumong pagdala sa impormasyon kalabot sa pag-implementar sa RA 10068 ngadto sa katawhan uban ang paghisgot-hisgot kabahin sa pagkausab sa klima kon climate change, organic farming, health and wellness ug practical urban gardening. 

Sila usab giawhag paghimo sa organic agriculture sa ilang kalungsuran ug barangay. 

Ang organic farming ug climate change gihisgutan ni Provincial Environment and Natural Resources Officer Teodorico Barral, health and wellness ni Pamela Ida Dominguez, nutrition officer sa Integrated provincial Health Office (IPHO) ug ang Urban Gardening ni retired DA 7 crops division chief Jorge Paculba. 

Ang RA 10068 gipalapnag ni Agricultural Provincial Coordinating Officer Bernadette Bunado, usab usa sa focal persons sa organic agriculture. 

Kahinumduman nga si Pangulo Benigno S. Aquino Jr. mismo miila nga ang organic agriculture adunay dakong potensyal pag-uswag sa abot ug kita sa mga mag-uuma ingon man paghatag ug pagkaon sa tanan. 

Pinaagi niini, ang mag-uuma makasiguro sa luwas nga pamaagi sa pang-agrikultura ug makapahiuli sa kayutaan. Kini usab makapaubos sa polusyon ug pagkadaut sa kalikupan ug paglikay sa pagkaguba sa mga kinaiyahan ug makaaayo sa kalawasan sa mga mag-uuma, konsumers ug sa tibuok katawhan, sumala pa niya. (MBCN/RAC-PIA7 Siquijor) 

==============

Gubernador sa Siquijor miawhag sa tanang Siquijodnon pagsuporta sa ‘organic farming’

SIQUIJOR, Aug 16 (PIA) -- Miawhag ang gubernador sa lalawigan sa Siquijor sa tanang mga mag-uumal, opisyales sa barangay ingon man tanang mga tunghaan sa isla sa pagsuporta sa Organic Agriculture Law of the Philippines kon Republic Act 10068. 

Sa gihimong information caravan sa tanang kalungsuran ug pipila ka mga tunghaan lukop sa probinsya, si Gubernador Orlando A. Fua Jr. miduso sa iyang kusganong suporta sa maong balaod ug paghangop niini sa makanunayon ug luwas nga paagi sa panguma kon “sustainable organic and ecological food production.” 

Samtang si Fua miangkon nga ang paghangop sa organic agriculture makadugang ug gamayng kadugay sa mga magbabaol aron ilang maanghkonang gitinguhang gidaghanon sa produksyon, siya miigon nga sa una lamang kini ug kuasganong pa kusganon gayud ang iyang suporta aron lamang maangkon ang kaluwasan sa katawhan, mapreserba sa ekolohiya, ug sa ngadto-ngadto, maangkon ang kaayo sa produksyon ug makadugang sa kita sa mga mag-uuma. 

Sa maong infocaravan, gidayeg ni Fua ang mga tinugyanan ug katawhan sa Department of Agriculture sa pag-ulo sa kalihukan pagpromoter sa “sustainable organic and ecological agriculture” samtang iyang giawhag ang tanan paghangop niini. 

Ang RA 10068 nag-establisar sa programa sa “comprehensive organic farming” nga naglangkob sa mga kaayohan alang sa mga mag-uuma aron mohimo sa maong matang sa panguma nga luwas sa makadaut nga mga abuno ug “pesticides” 

Ang bag-ong balaod nga gilagdaan niadtong Abril 6, mitukod usab sa gitawag ug National Organic Agricultural Board (NOAB) nga maoy mohatag direktiba sa mga palisiya ngadto sa pagpromoter sa organic farming sa paningkamot nga mapromoter usab ang himsog nga katawhan ug kalikopan. 

Sa probinsya sa Siquijor, ang Provincial Organic Agriculture Board (POAB) ug Provincial Technical Working Group maoy nanguna sa tanang adbokasiya sa bag-ong balaod. (MBCN/RAC-PIA7 Siquijor)