Bag-ong P1.5M PDRRMC OpCen sa Siquijor gibendisyonan

By Rizalie A. Calibo

SIQUIJOR, Hulyo 11 (PIA) -- Gianagurahan sa kagamhanang lokal sa lalawigan sa Siquijor ang bag-o pa lamang nahuman nga Operation Center alang sa Provincial Disaster Risk Reduction Management Council (PDRRMC). Kini nagkantidad ug P1.5 milyones, sumala pa ni PDRRMC executive officer Arturo Pacatang. 

Matud pa niya, ang maong sentro kalabot sa paningkamot sa kagamhanan pagpauswag sa serbisyo sa matang sa komunikasyon ug uban pang kagamitan pagresponde higayon sa katalagman. 

"This will strengthen our reporting system and other preparations to easily manage disasters (kini makapalig-on sa atong sistema pagreport sa mga panghitabo ug pagdumala sa mga kakulian)," dugang pa niya. 

Hinuon iyang giawhag ang mga miyembro sa komitiba sa PDRRMC ug miyembrong ahensiya niini paghimo ug mga lakang kon action plans ug pagmaabtik sa ilang katungdanan ilabi na higayon sa kalamidad. 

Ang operation center nga anaa karon sa provincial capitol area pagatawoan ni Civil Defense assistant Blezel Omictin. 

Si Msgr. Candelario Catubig mao ang nagbendisyon sa bag-ong edipsiyo ssa presensya nila ni Gobernador Orlando A. Fua, ulo sa mga kagamhanang nasyonal sa probinsiya ug uban pang sakop sa PDRRMC. (RAC-PIA7, Siquijor) 

============

Dugang ekipo pagpangandam sa kalamidad gihatag sa Siquijor

By Rizalie A. Calibo

SIQUIJOR, Hulyo 11 (PIA) -- Mihatag ang provincial disaster council sa Siquijor ug dugang 20 ka Kenwood hand-held radios ug mga early warning systems, preparedness ug response nga mga ekipo ngadto sa upat niini ka mga komitiba. 

Mohatag usab ang (PDRRMC) ug lain pang 12 ka heavy duty ug upat ka underwater flashlights, duha ka underwater digital cameras, tulo ka transistor radios, duha ka repeaters ug 12 ka battery chargers. 

Atol sa panagtigum sa PDRRMC didto sa Sangguniang Panlalawigan session hall sa Siquijor provincial capitol, si PDRRMC executive officer Arturo Pacatang miingon nga ang lalawigan nakaangkon ug labing menos 30 ka handheld radios ug uban pang ekipo gikan sa pondo sa LDRRF kon local disaster risk reduction and management fund (LDRRMF) sa milabayng tuig. 

Upat niini gihatag na sa Integrated Provincial Health Office (IPHO),ug sa Provincial Social Welfare and Development (PSWD), ug sa duha ka mga barangay sa Lazi. 

Sumala pa niya nga ang mga komitiba sa mitigation, response, rehabilitation ug preparedness pinaagi sa nag-ulo nga ahensiya kinahanglan makadawat ug tag lima ka hand-held radios ug duha ka flashlights uban ang charger nga usab iapod-apod sa ilang miyembro. 

Ang usa ka repeater anaa mahimutang sa Mt. Bandilaan ug ang lain pang usa ibutang sa IPHO. 

Samtang ang underwater camera ug underwater flashlights gihatag sa Bantay Dagat task force ug sa emergency rescue team, matud pa usab ni Pacatang. 

Dugang pa niya nga ang lalawigan adunay regular nga imbentaryo sa mga ekipo ug sa higayon nga adunay panghitabo kon kalamidad, andam kining magamit. 

Giawhag usab ni Pacatang ang PDRRMC paghan-ay ug resolusyon pagtugot paggamit sa 2011 PDRRMC budget balance aron ipalit ug usa ka rubber boat alang sa water search and rescue, 135 horse power unit nga makina alang sa Samaritan boat o bag-o ba hinuong speed boat nga magamit pagdala sa mga pasyente sa Siquijor ngadto sa Dumaguete panahon sa emerhensya samtang siya miaangkon sa mga kakulangan sa ospital sa lalawigan. (RAC-PIA7, Siquijor)