P25-M ayuda ihatag sa DSWD ngadto sa biktima sa bagyo sa NegOr

By Rizalie A. Calibo

DUMAGUETE CITY, Hunyo 23 (PIA) -- Labaw sa tres mil ka pamilya sa Negros Oriental kansang panimalay naapektohan sa bagyong Sendong nga mihapak sa nasud niadtong Desyembre sa miaging tuig gitakdang makadawat ug ayuda gikan sa Department of Social Welfare and Development (DSWD). 

Mosuma sa 2,883 ka pamilya ang modawat sa gitawag ug Emergency Shelter Assistance (ESA) gikan sa DSWD, atol sa dungan nga sermonyas sa pagpanghatag nga pagahimoon sa Provincial Convention Center sa Dumaguete City ug sa City Hall sa Tanjay City. 

Ang matag pamilyang benepisyaryo sa ESA family beneficiary kansang panimalay naa sa kategoryang “partially damaged” makadawat ug P5,000 alang sa pagpaayo sa ilang kabalayan, matud pa ni DSWD-7 regional information officer Jaybee Binghay sa iyang pahayag. 

Kadtong nalakip sa “totally damaged” nga mga panimalay apan dili buot mobalhin sa ilang nahimutangan makadawat ug P10,000 matag usa, dugang pa niya. 

Atol usab sa pagpanghatag, lain pa nga 134 ka pamilya ang nakadawat sa ilang Core Shelter Assistance Project (CSAP) nga ayuda alang sa pagtukod ug bag-ong kabalayan sa lungsod sa siaton ug Bacong. 

Kini alang niadtong mga pamilya kansang mga nakit-ang “totally damaged” nga buot motukod sa bag-ong luna ug sila makadawat sa tag P70,000 aron pagtukod sa ilang kaugalingong “core shelter units” sa maong mga lungsod. 

Samtang kadtong pamilya nga ubos gihapon sa CSAP ug buot motukod sa ilang panimalay sa ilang kaugalingong luna sa cluster nga lima makadawat ug tag P50,000. 

Ang mga pamilyang mahiagom sa ESA ug CSAP nga hinabang mao kadong gikan sa naigo ug bagyo sa lungsod sa Siaton, Sibulan, Bacong, Valencia, San Jose, Amlan, Pamplona, Mabinay, ug siyudad sa Dumaguete ug Tanjay, nga mosuma ug 3,017 ka benepisyaryo. 

Si DSWD-7 Regional Director Ma. Evelyn Macapobre miingon nga ang pondo sa ESA ug CSAP nagtumong pagtabang niadtong mga naapeltohan sa bagyo. 

Sa sumang pondo, P15,940,000 gigahin sa ESA, samtang ang nahibilin nga P9,380,000 alang sa pagtukod sa 134 ka “core shelter units”. 

Si Macapobre usab midugang nga ang mga hingtungdang kagamhanang lokal kinahanglan makatuman sa mga panginahanglanon ilabi na sa luna diin pagatukoron ang “core shelter houses” isip kontribusyon sa LGU. 

Ang maong proyekto dili lamang makahatag ug bag-ong ug luwas nga pinuy-anan sa mga hingtungdan apan maga-aghat usab sa ilang partisipasyon sa pagtukod sa ‘Bayanihan’ nga paagi, sumala pa usab ni Binghay (Translated by RACalibo-PIA 7, Siquijor)