Helmet Law hingpit nang ipatuman sa Enero 2013

By Ferliza C. Contratista

CEBU CITY, Dec. 29 (PIA) -- Gilaoman nga momenos unya ang mga makalas nga kinabuhi sa mga aksidente sa motorsiko human ipatuman sa hingpit ang Motorcyle Helmet Act karong Enero 2013. 

Kini bisan sa panglantaw sa mga awtoridad nga aduna unyay masinati nga gamayng kagubot sa pag implementar niini sunod semana. 

Sa gipahigayon nga “final briefing” alang sa mga enforcers sa Republic Act 10054, si Land Transportation Office 7 (LTO) regional director Raul Aguilos nagkanayon nga malaumon sila nga ang gidaghanon unya sa mga makalas nga kinabuhi ug makahiagom og seriosong kadaot mukonhod na tungod kay ang mga drivers ug mga angkas sa motorsiklo magsul-ob naman og mga “prescribed” helmets. 

Sa nasayran sa kinatibuk-ang gidaghanon sa mga aksidente sa kadalanan, 80 porsyento niini sa motorsiklo ug kasagaran moresulta sa pagkakalas sa kinabuhi. 

Ang RA 10054, matod ni Aguiluz ipatuman sa kinatibuk-an bisan pa man og aduna pay kaso sa pagpugong niini nga anaa pa sa korte. 

“In the absence of a TRO, we will and we shall implement the law,” (amo gyud nga ipa-implementar kini nga balaod) matod pa ni Aguilos. 

Siya mikompirmar nga sa pagkakaron aduna na lamang usa ka kaso ang gipaabot nga mahukman ug anaa kana sa usa ka korte sa Probinsya sa Bohol. 

Sayo ning tuiga adunay pipila ka mga lumolupyo ug bisan mga lokal nga pangagamhanan ang mipasaka og kaso sa pagpogong sa pag implementar niini lakip na ang Dumaguete City, ang gitawag nga “motorcycle capital” sa Pilipinas. 

Miresulta kini sa pag uswag sa implementasyon gikan niadtong Agosto 2012 ngadto sa Enero 2013. 

Nasayran nga ang Dumaguete City supak bisan pa man sa pagamit sa helmet ug ang mga lumolupyo niini dakpon na sugod sa semana sa dili pagsul-ob og kon wala kini International Compliance Certificate (ICC) nga sticker sa ilang mga helmet. 

Matod ni Aguilos nga dili na sila moatubang pa sa mga reklamo kabahin sa balaod. Ug kung duna pay moreklamo adto na lang isang-at sa Korte. 

Sa laing bahin, bisan pa man sa hingusganong kampanya sa RA 10054 sa mga probinsya sa Central Visayas nakita ni Department of Trade and Industry 7 (DTI) regional director Asteria Caberte nga aduna pa silay masinati nga ginagmayng problema sa pag implementar. 

Si Caberte nagkanayon nga sokad Hunyo ning tuiga, mikabat na ngadto sa 23,000 ang napapitlan sa ICC sticker. 

Matod ni Engr. Dario Cabarrubias nga angayan lang nga siguroduhon sa mga enforcers nga adonay ICC sticker sa likod sa helmet o Product Standard (PS) mark. 

“Avoid arguing on the look, genuiness of the ICC sticker, don’t ask for a receipt from DTI for the sticker and avoid arguing about the brand,” Cabarrubias said. (Dili na lang tanawon ang hitsura, o kung orig ba ang ICC sticker, ayaw nag pangayo-i sa receipt gikan sa DTI ug ayaw na pagpakiglantugi kabahin sa brand sa mga helmet.) 

Ilang gihangyo nga gikinahanglan nga adunay close coordination ang local nga DTI, LTO ug ang mga kapolisan. 

Mohunong na sa pag pang sticker ang DTI alas sinko sa hapon sa Disyembre 28. 

May multa nga P1500 ang First offense alang sa mga nakalapas sa Motorcycle Helmet Act; P3,000 alang sa mga second offenders ug P5,000 sa third offenders. 

Multahan sa P10,000 ang kadtong masakpan nga mangopya o mogamit sa mga pekeng sticker.(mbcn/FCC/PIA-Cebu) 

=============

Sinulog 2013 dili magkinahanglan ug ‘gun ban’

By Juju Manubag-Empuerto

CEBU CITY, Dis. 29 (PIA) --- Ang Sinulog 2013 saulogon sa ikatulong Dominggo sa Enero ug dili kini manginahanglan ug ‘gun ban’ sulti ni Sr. Supt Louie Oppus, ang Police Regional Office (PRO)-7 Director for Operations. 

Sumala pa ni Oppus, sa Enero 13 pa lang sugdan na ang election gun ban ug matapos sa Hunyo 17. Maapil niini ang mga petsa sulod sa kasa-ulogan sa Sinulog. 

Ang mga unipormadong pulis nga adunay duty ug kadtong anaa sa lista nga ginganlan sa Comelec Resolution 956, mao lamang ang gitogutan nga makadala ug pusil sa maong panahon, dugang sa opisyal. 

Si Oppus mipahibalo nga gisuspenso ang mga lisensiya nga makadala ug pusil guwa sa ilang panimalay ug niadto usab nga walay pagtugot sa Commission on Election (Comelec) 

Ang mga miyembro lang sa Presidential Security Group (PSG) ang dunay pagtugot sa pagdala-dala sa ilang mga pusil. (mbcn/JSME/PIA-Cebu)