Pagbukas sa klase sa Siquijor, malinawon ug hapsay

By Rizalie A. Calibo

SIQUIJOR, June 15 (PIA) -– Malinawon ug hapsay ang pagbukas sa klase sa lalawigan Siquijor, sumala pa sa lokal nga buhatan sa Department of Education (DepEd) ug Philippine National Police (PNP) sa lungsod sa Larena. 

Matud ni DepEd-Siquijor Administrative Officer Loreta B. Tangapa, wala ni usa ka reklamo ang ilang nadawat gikan sa mga tinun-an ug ginikanan kabahin sa pagbukas sa klase karong tuiga. 

Si Tangapa miingon nga ang ilang buhatan hugot nga mipasiugda ug monitoring sa tanang tunghaan sa tibuok probinsya sugod niatong Mayo 28 apan hangtud karon, wala gayud negatibong taho kon reklamo nga ilang nadawat. 

Nianang mga panahona, hapsay kaayo ang dagan sa mga aktibidades sa mga tunghaan, matud pa niya. 

Samtang ang DepEd planning officer nga si Vivian Bomediano usab mitaho nga niadtong Hunyo 4, adunay 7,221 ka tinun-an sa elementary ug 3,332 sa sekondarya ang narehistro sa DepEd gikan sa pipila ka mga publikong tunghaan sa lalawigan nga mireport sa buhatan. 

Kini, matud pa tentatibong gidaghanon pa lamang tungod kay ang overall nga gidaghanon sa na-enrol wala pa makuha ug naghulat pa ug report gikan sa mga district supervisors. Wala pa gani report gikan saa mga pribadong tunghaan, matud pa niya. 

Sumala pa, adunay 64 ka publikong tunghaan sa elementarya, 14 sa sekondarya, ug napulo ka pribadong tunghaan ang anaa sa Siquijor. 

Ang PNP usab, mitaho nga walay problem sa kalinaw atol sa pagbukas sa klase. 

Si Intelligence Officer PO1 Eden Pactol sa Larena Police Station miingon nga wala usab negatibong taho kon dili maayong panghitabo ang nasinati niadtong mga panahona. Apan, sumala pa, gipanghingusgan pa gihapon nila ang “police visibility” sa tanang tunghaan. 

“Ngani, padayon kaming mitabang sa mga tinun—an ilabi na sa pagtabok sa mga ‘pedestrian lanes’ aron masiguro ang ilang kaluwasan,” sumala pa niya. (mbcn/RAC-PIA 7, Siquijor)