DOH-7 niduso sa mga batan-on nga mopasiugda sa pagkaon og utanon

By Amorganda A. Saludar

CEBU CITY, June 20 (PIA) -- Ang Department of Health (DOH)–7 nag-aghat sa mga batan-on nga mopasiugda sa pagkaon og mga utanon ug prutas ingon man mamahimong modelo sa ilang tagsa-tagsa ka mga pamilya pinaagi sa pagbatasan nga iapil kini sa ilang inadlaw nga pagkaon. 

Giluwatan kini nga panawagan ni DOH-7 assistant regional director Lakshmi Legaspi taliwala sa nigawas nga mga taho nga nikunhod ang kunsomo sa utanon dinhi sa Central Visayas. 

Gitataw ni Legaspi nga ang pagkaon og utanon importante alang sa pagmintenar sa maayo nga panglawas. Ug nga ang maayo’ng panglawas nagpasabot nga ang immune system dili humok nga patakboyan og sakit. 

Dugang pa niya nga base sa statistics nga ang namatikdan nga pagkunhod sa konsumo sa utanon naggumikan kay ang mga kabatan-onan magsalig na man lang sa mga street food . 

Giklaro usab ni Legaspi nga mao kini ang dako nga hinungdan sa ilang hugot nga pagpanawagan sa mga kabatan-onan nga maoy mopasiugda sa pagkaon uog utanon dinha sa ilang tagsa tagsa ka mga pamilya, iya usab nga gipahibalo nga ang kasaulogan sa Nutrition Month sunod buwan magdala sa tema nga “Pagkain ng Gulay Ugaliin, Araw-araw Itong Ihain. (Make eating vegetable a habit. Serve it everyday.)” 

Gipadayag usab niya nga ang pagtaas unya sa konsumo sa utanon makatabang usab sa mga pananomay og utanon dinhi sa rehiyon nga makasustenar sa ilang panginabuhian sanglit ang dako nga panginahanglanon sa utanon nagpasabot og taas nga supply ug gumikan unya niini motaas usab kita sa mga mag-uuma. 

Bisan pa man kung giangkon ni Legaspi nga kasagaran sa mga katawhan karon dili gayod kaayo hilig sa pagkaon og daghan nga utanon kumpara sa karne apan matud pa niya nga ang gikinahanglan nga bitamina ug mineral nga makuha sa pagkaon og mga utanon aron makaangkon og maayo nga panglawas ug makasanta sa mga sakit dili ikakumpara. 

Iya usab nga giaghat ang tanan nga mga sektor ug organisasyon nga moimplementar og ila nga kaugalingon nga adbokasiya ug programa pagpataas sa kunsomo sa utanon ingon man pagpahimangno sa publiko sa mga benipisyo ug sa ilang kontribusyon pagpausbaw sa ekonomiya pinaagi sa pagkahimsog ug produktibo nga mga katawhan dinhi sa nasud. 

Matud pa ni Legaspi nga kitang tanan kinahanglan nga mosalmot ug mohimo sa atong bahin sa pagpausbaw sa kunsomo sa utanon ug mag-agni sa mga batan-on sa pagkaon kanunay og utanon. (RMN/AAS-PIA7 Cebu)