TESDA nagtinguha pagpa-usbaw sa kababayen-an

By Amorganda A. Saludar

CEBU CITY, May 7 (PIA) -- Ang Technical Education and Skills Development Authority (TESDA) maninguha sa pagpa-usbaw ug pagpalambo sa mga kababayen-ang mga organisasyon alang sa kalamboan sa tibuok nasud. 

Si TESDA director general Joel Villanueva mituo sa kabililhon sa mga kababayen-an sa pagpausbaw sa kalamboan sa nasud. 

Nagkanayon si Villanueva nga gikinahanglan sa mga kababayen-an nga mahatagan sa oportunidad ug luna aron sila makapasundayag sa ilang mga abilidad, kapasidad ug kahanas sa pagmugna sa mga positibo nga kausaban alang sa pagpalambo sa nasud. 

Gitataw ni Villanueva nga aduna na'y pipila ka mga TESDA-accredited women centers sa nasud nga naghatag sa mga skills ug livelihood trainings ingon man usab entrepreneurship training program ngadto sa mga kababayen-an. 

Nana-ad ang TESDA sa paghatag sa mahinungdanong mga programa alang sa kausbawan sa mga kababayen-an. 

Matud pa ni Villanueva nga ang TESDA milagda na usab usa ka kasabotan tali sa Coke Philippines sa paghatag niini sa mga programa sa livelihood ug small entrepreneur ngadto sa mga kababayen-ang organisasyon sa tibuok nasud. 

Subay niini ang TESDA maninguha sa pagtubag sa mga panginahanglanon sa mga mag-uuma ug mga mangingisda sa nasud pinaagi sa paghatag sa mga basic skills ngadto kanila aron makataban kini sa pagpagaan sa ilang inaadlaw-adlaw nga gimbuhaton. 

Ang TESDA pagpakig-alayon usab sa uban pang mga ahensya sa gobyerno nga responsable sa mga yango-ngo sa mga mag-uuma ug mga mangingisda. 

Gipadayag ni Villanueva nga aduna na usab sila’y gilagdaan nga kasabutan tali sa Department of Agriculture alang sa pagpahigayon sa mga training ngadto sa mga mag-uuma ug mga mangingisda bisan lang sa mga basic skills nga dako kaayo ug ikatabang kanila. 

Mga pagbansay-bansay sama sa engine repair ug refrigeration ang mga butang nga labaw nga gikinahanglan nga makat-onan sa mga mag-uuma ug mga mangingisda. 

Matud pa ni Villanueva nga dako gayud ang ilang tinguha nga mobansay bansay sa mga mag-uuma ug mangingisda dungan sa pag-aghat kanila ng mopahimulos gayud sa mga programa sa TESDA. 

Si Villanueva ang pinasidunggan nga dinapit atol sa selebrasyon sa TESDA’s Trainees Day sa University of Cebu – Mambaling Cebu Campus niadtong miaging Mayo 4.(mbcn/AS-PIA 7, Cebu)