Mograduar nga mga benepisaryo sa 4Ps gipangamdaman sa DSWD-7

By Juju Manubag-Empuerto

CEBU CITY, May 5 (PIA) -- Gipanghingusgan na sa Department of Social Welfare and Development (DSWD-7) ang 'Sustainable Livelihood Development Program' (SLDP) niini alang sa mga mahuman nga mga banay nga benepisaryo sa Pantawid Pamilayang Pilipino Program kon (4Ps) sa umaabot nga 2012. 

Ang programa motino nga makabarog sa ilang panalapi kadtong gi-abagan sa 4Ps. Ang 4Ps nga conditional cash transfer (CCT) mahuman ug lima ka tuig. 

Kapin sa 20,000 ka mga benepisaryo sa programa dinhi sa Central Visayas ang gibana-bana nga mahuman ug mo-gradwar sa sunod tuig human kini makapahimulos sa tabang pinansyal sukad sa tuig 2009. 

“Kadaghanan sa 22,003 nga mo-gradwar nga mga benepisaryong banay sa rehiyon taga-Negros Oriental diin 19,503 ni sila ug ang nahabiling 2,500 taga-diri sa siyudad sa Sugbo,” pahibalo ni Brigieda Goron, ang DSWD-7 provincial link officer sa probinsiya sa Sugbo alang sa programa nga Pantawid. 

Magdawat ug P1,400 kada bulan, ang kinadak-ang hinabang pinansyal nga madawat, diin ang P500 alang sa kabaskog sa panglawas nga panginahanglan, samtang ang P900 alang sa edukasyon nga panginahanglan sa mga bata nga nag-edad ug 14 anyos paubos ug hangtod tulo lamang ang pwedeng mahisakop nga may P300 ang bulan matag usa. 

Sumala ni Goron nga ang programa nagsugod niadtong 2009 ug adunay kapin sa 20,000 lang ka mga banay ang nakapahimulos sa 4Ps sa sinugdanan. 

“Sa pagka-karon, adunay kapin na sa 206,000 ka mga banay ang mga benepisaryo sa 4Ps dinhi sa Central Visayas,” dugang ni Goron. 

Ilang tinguha nga karon pa lang ilang matabangan kadtong mga benepisaryo nga mahuman sa sunod tuig nga makabarog na sila sa ilang kaugalingon. 

Adunay panginabuhian nga makatabang kanila nga makasustinir sa panginahanglanong pagpa-edukar ug sa panglawas sa ilang banay sa higayon nga dili na kini magdawat ug ayuda gikan sa kagamhan, sulti ni Goron. 

Ubos sa SLDP, adunay tulo nga naglangkob ang programa. Kini mao ang Self-Employment Assistance-Kaunlaran kon (SEA-K), Guaranteed Employment ug ang Production Unit. 

Gipahibalo ni Jimmy Crusio, DSWD 7 project development officer sa Pantawid Program sa Cebu City sa Kapihan sa PIA nga adunay 250 nang nakadawat ug nakapahimulos ug paghulam sa SEA-K sa kantidad gikan P1,000 hangtod sa P10,000, nga walay tubo. 

“Nakahatag na ang buhatan sa DSWD-7 ug P1.3 milyones nga ayudang pinansyal sa 250 ka mga benepisaryo sa siyudad sa Sugbo lang,” ingon ni Crusio. 

Usa niini nga nakapahimulos mao ang grupo ni Dionesia Burdas nga Sudlon 4Ps SEA-K Association sa Sudlon 2 sa dakbayan, diin nakadawat sila ug P135,000 nga SEA-K lon sa miaging tuig. 

Karong Mayo 24 mahuman na sila ug bayad tungod usa ra ka tuig ang termino sa maong pautang. 

Matod pa ni Burdas nga nakatabang jud ug dako sa iyang pamilya ang pagpanghulam sa kagamhan kay nagamit niya ni nga puhunan sa pagpananom ug luy-a ug sili ug sa pagbuhat ug budbod. 

“Naa jud koy makita nga agi sa kanunay sa akong tanom ug pagtinda ug bodbod, ” ingon ni Burdas (mbcn/jsme/PIA-Cebu)