Pagkaindependente sa mga Cebuanos hinungdan sa kauswagan

By Amorganda A. Saludar

CEBU CITY, Mayo 4 (PIA) -- Ang secretary sa Presidential Communications Operations Office (PCOO) nga si Herminio "Sonny" Coloma Jr. miila sa pagka-independente sa mga Cebuanos mao ang labing dakong hinungdan luyo sa prosperidad nga nakab-ot karon sa probinsya. 

Si Coloma miingon nga ang mga Cebuanos labaw nga nailhan nga mopadayag gayud kung unsa ang anaa sa ilang hunahuna. 

Si Coloma nianhi sa Cebu niadtong miaging semana isip pinasidunggang dinapit atol sa ika 12th nga kasaulogan sa ‘Kadaugan sa Mactan’ didto sa Liberty shrine sa siyudad sa Lapu-lapu. 

Siya midugang sa pag-ingon nga ang pagpadayag sa hunahuna sa tawo sa mga butang nga makadagit sa interes sa publiko mahinungdanon alang sa kalambuan sa usa ka probinsya tungod kay kini nagpasabot nga ang mga tawo nanginlabot. 

Dugang pa ni Coloma nga gawas sa Cebu aduna usa’y lain nga mga dapit sa nasud nga nagpakita sa susamang pagkaindependente sa mga katawhan nga nakatampo sa kinatibuk-ang kalamboan sa nasud. 

Gibutyag sa kalihim nga pinakaimportanteng hinungdan sa prosperidad mao ang paghatag og gahum sa katawhan ug mao usab kini ang katuyoan sa administrasyo’ng Aquino ngadto sa mga Pilipino. 

Matud pa niya nga kung ang mga katawhan mahatagan og luna sa pagpadayag sa ilang hunahuna aron kini madunggan sa kadaghanan kini nagpasabot nga gitagaan usab sila og gahum nga manginlabot ug motampo sa kausaban sa kalibutan. 

Dugang pa ni Coloma nga ang paghatag og gahum sa katawhan mao ang tumong ni president Aquino ngadto sa mga Pilipino sanglit ang uban nga mga programa sa kagamhanan gipatuman tumong ngadto sa paghatag og gahum sa katawhan. 

Gipadayag usab niya nga si presidente Aquino andam sa pagdawat og mga intelligent debates sa mga hisgutanan ug isyu nga aduna’y nasudnong interes tungod kay gusto niini nga ang mag katawhan makpadayag sa ilang panahom kalabot sa mga isyu nga may kalambigitan sa katawhan ug sa nasud. 

Sa Lapulapu City nisaksi usab si Coloma sa gipahigayon nga reenactment sa makasaysayon nga panag-away tali nila ni Spanish conqueror Ferdinand Magellan ug sa banggiitan nga Sugboanon’ng manggubat nga si Lapu-lapu sa isla sa Mactan mga 491 ka tuig ang nilabay. 

Sa iyang pagpamulong nagkanayon ang kalihim nga ang kapildihan ni Magellen kinsa nagtinguha nga sakopon ang isla sa Mactan nagmatuod lamang nga ang mga Cebuanos sa kinatibuk-an mga isog ug dungganan ug dili gayud motugot nga mailog sa mga langyaw ang ilang yuta nga natawhan. (mbcn/AS - PIA 7, Cebu)