Lapulapu City haom alang sa turismo ug patigayon

By Amorganda A. Saludar

CEBU CITY, May 3 (PIA) -- Si Presidential Communications Operations Office (PCOO) Secretary Sonny Coloma Jr. mi-agni sa siyudad sa Lapu-lapu nga ipadayon niini ang pagpa-usbaw sa iyahang pinakamaayo nga assets- ang turismo ug patigayon. 

Matud pa ni Coloma nga ang siyudad sa Lapu-lapu naila na isip usa sa mga siyudad sa nasud nga perpekto ug haom alang sa patigayon gawas sa pagka ilado niini isip destinasyon sa mga turista tungod sa mga white sand beaches nga makita dinhi ingon man usab mga world class resorts nga dugokon sa daghang turista. 

Sa iyang mensahe isip keynote speaker atol sa ika 12 nga kasaulogan sa “Kadaugan sa Mactan” sa Liberty Shrine sa siyudad sa Lapu-lapu niadtong miaging semana gibutyag ni Coloma nga ang siyudad ang pinakadako nga sentro sa komersyo ug industriya sanglit dinhi usab nahimutang ang usa sa mga pinakadako economic zones sa nasud ang Mactan Export Processing Zone. 

Sumala pa ni Coloma nga ang siyudad giila usab sa iyang alma mater ang Asian Institute of Management, isip usa sa mga siyudad sa nasud nga sayon ra ang pagpahigayon og patigayon. 

Giagni usab ni Coloma ang mga residente nga makighiusa uban ni Lapulapu City Mayor Paz Radaza sa pagkab-ot sa vision sa paghimo sa siyudad nga ”healthy haven for tourism, business, investment, residence and recreation.” 

Dugang pa niini gihagit usab sa kalihim ang siyudad sa Lapu-lapu nga mamahimo ganghaang siyudad sa turismo dinhi sa Sugbo ug mamahimo nga numero uno’ng endorser sa turismo dinhi sa probinsya. 

Nanawagan usab ang kalihim sa ngalan ni Presidente Aquino ngadto sa publiko nga makigtambayayong sa paningkamot sa kagamhanan sa pagtuboy sa nasud nga mamahimo’ng lig-on nga sentro sa patigayon ug industriya ingon man labing angayan nga venue sa investments nga makahatag usab og dugang nga opurtunidad sa mga katawhan. (MBCN/AS-PIA7 Cebu)