Coloma misugyot nga himuong Lapulapu Int'l Airport ang MCIAAron pagpasidungog sa kabayanihan ni Lapulapu batok sa mga langyaw

By Juju Manubag-Empuerto

CEBU CITY, April 30 (PIA) -– Imbes himoong balaod ang pagsaulog sa Kadaugan sa Mactan matag 27 sa Abril matag tuig, ang Kalihim sa Presidential Communications Operations Office (PCOO) nga si Hermino "Sonny" Coloma, misugyot nga mas takos nga pasidunggan ang kinaunhang bayani nga si Datu Lapu-lapu nga ipangalan Kaniya ang Mactan Cebu International Airport ngadto sa Lapu-Lapu City International Airport. 

Kini nga sugyot tubag sa pangutana sa Cebu media nganong dili na man lang himuon nga usa ka nasyonal holiday ang Kadaugan sa Mactan diin si secretary Coloma ug and Lapulapu mayor Paz Radaza miatubang kanila pinaagi sa usa ka media interaction, April 28 didto sa Manny O bar, Movenpick Hotel, Lapulapu City. 

Si Coloma maoy pinasidunggang dinapit nianang buntag nga selebrasyon sa ika-12 nga "Kadaugan sa Mactan" nga gipahigayon sa Liberty Shrine sa Lapu-lapu City. 

Sa tuig 1521, (491 na katuig) ang milabay diin ang datu sa Mactan nga si Lapu-Lapu nanalipod sa isla batok sa mga Espanyol nga mga kongkistadores nga gipangunahan ni Ferdinand Magellan. 

Matod pa ni Coloma ang Pilipinas adunay daghan nang mga holiday nga ginasaulog kumparar sa ubang mga nasod ug kung dungagan pa kini, makapig-ot na ngadto sa mga tigpapatigayon kay maapektohan ang ilang mga negosyo. 

“Naningkamot ta nga makadani ug mga langyaw nga tigpamuhunan sa atong nasod. Gusto natong ipasundayag ang Pilipinas nga makahatag ug maayong lugar alang sa ilang pagbubo ug puhunan ug ang daghang holiday makapa-discourage kanila nga moari,” ingon ni Coloma. 

Bisan ug gi-deklarar nga holiday sa dakbayan sa Lapu-Lapu lamang niadtong Biernes, ang kagamhanang lokal gikinahanglan pa nga mohangyo sa Malacañang aron makapakanaog ug usa ka ‘Presidential Proclamation’ nga I-deklarar ang petsa nga ‘special holiday.’ 

“Mas maayo siguro nga ipangalan ang tugpahanan ug ibutang ang ngalan nga Lapu-Lapu aron katagaan siya ug takos nga pagpasidungog kay sa pagpangayo ug permanenteng deklarasyon nga holiday matag Abril 27," panapos ni Coloma. 

Si Lapu-apu City Mayor Paz Radaza mura ug uyon usab sa maong ideya ni Coloma. (mbcn/jsme-PIA 7, Cebu)