PAF Mactan magselebrar sa 65th Founding Anniversary

By Hazel F. Gloria

LAPU-LAPU CITY, May 13 (PIA) -- Mipahigayon ang Philippine Air Force og pre-celebration alang sa PAF 65th Founding Anniversary didto sa Brigadier General Benito N Ebuen Air Base (BGBNEAB) kiddies park, kagahapon. Kini kalabot sa proyekto Maj. Gen. Lauro Catalino dela Cruz. 

Ang mga benepisyaryo sa maong aktibidad mao ang mga deaf-mutes, orphans, ug mga dependents gikan sa Christ Faith Childrens Home, Naga Special Education Center ug sa Military Dependents. Miagi sa screening ang pagpili kanila. 

Adunay 45 ka mga deaf-mutes, 22 orphans ug gibana-banang usa kagatos kapin ang mga dependents. 

Nagkanayon usab ang nagkalaing-laing units sa PAF arun sa pagpasiugda sa nahisgutang aktibidad. Apil sa mga units mao ang 2nd Air Division, 560 Air Base Wing, Hukbong Himpapawid ng Pilipinas, Tactical Helicopter Wing PAF, 220 Airlift Wing. 

Adbokasiya sa PAF mao ang makahatag og hinabang ug pagpahalipay sa mga benepisyaryo nga ilang napilian. Mihatag sila og libreng pagkaon para sa mga bata, mga regalo sama sa mga bags, school supplies, mga duwaan ug uban pa. 

Matud pa ni LTC Dennis T. Antenor Cruz PAF nga ang tinuig nga selebrasyon sa Manila kanunayng ipahigayon, apan ilang nasinati nga mas daghan pa ang nanginahanglang mga kabus sa mga probinsya. 

Karong tuiga, Children’s Par ty ang namugna nilang charity activity arun usab mahatagan og prebilihiyo ug patas nga oportunidad ang mga deaf-mutes, orphans, ug mga dependents. (hfg/PIA-RO7 & Maila Paguntalan/CNU Intern) 

============

Graduado sa IT sa Silliman nahimong usa sa pinasidunggang tinun-an sa CV

By Rizalie A. Calibo

DUMAGUETE CITY, May 13 (PIA) -- Usa ka bag-ong gradweyt sa Information Technology sa Silliman University ang napiling usa sa Ten Outstanding Students sa Central Visayas. 

Si Athena Gene Duran napili uban sa siyam pang mga tinun-an niadtong Mayo 1 sa Negros Oriental Convention Center diin nakahatag niya ug higayon nga napiling Ten Outstanding Students of the Philippines (TOSP). 

Ang TOSP adunay 20 ka regional finalists. 

Kini usa ka prestihiyosong pagpangita sa nag-unang batan-ong kaisipan nga adunay napamatud-ang katakos sa akademiko ug pagpamuno. 

Ang napulo ka mga pinasidunggan pagagantihan sa Malacañang Palace (sa wala pa nahibal-ang panahon) ug kini kasagaran pagatambongan sa Pangulo sa Pilipinas. 

Si Duran usa ka Sangguniang Kabataan chairperson sa Dumaguete. Migraduwar siyang cum laude niadtong March 2011 ug nakadwat usab sa University Leadership Award. 

Ang iyang mga nahimo ug kalamboan sa tunghaan uban sa madaogon niyang proyekto nga nag-ulohan “F-ExSys: An Anura Morphometric Classification Expert System”, nakahatag usab kaniya ug pasidungog nga Bank of the Philippine Islands-Department of Science and Technology Science Award niadtong February 2012. (mbcn/translated by RAC/PIA-Siquijor)

============

Silliman padayon sa pagtabang sa mga biktima sa linog

By Rizalie A. Calibo

DUMAGUETE CITY, May 12 (PIA) -- Padayong ang Silliman University sa ilang operasyon pag-alibyo kon “relief operation” ngadto sa mga biktima sa linog sa Negros Oriental. 

Mokabat na sa 338 ka pamilyang hilabihang naapektohan sa 6.9 nga gikusgon sa linog niadtong Pebrero ning tuiga ang nahimulos sa tabang nga gipasiugda sa maong Universidad. 

Usa ka grupo sa 30 ka mga tinun-an ug empleyado sa maong unibersidad miapod-apod sa mga “relief goods” ug mihatag ug panudlo kon lecture kabahin sa stress management, hygiene ug sanitation, ingon man food preparation ngadto sa mga biktima sa lungsod sa Tayasan. 

Ang maong grupo gilangkob sa sakop sa Silliman University Volunteer Fire and Rescue Unit, tinun-an ug magtutudlo sa College of Nursing, Psychology Department, Nutrition and Dietetics Department, ug pundok gikan sa University’s Counseling, Advocacy, and Research & Evaluation Education Services unit. 

Ang mikoordinar sa relief operations mao ang Institutional Advancement Office. 

Sumala ni Mark Raygan Garcia, Silliman info director, ang matag pamilya nakadawat ug putos sulod ang noodles, kape, bugas ug lain pa usab nga putos nga dunay mga sapot, sapatos, habol, tualya, unla, galamitan sa kusina ug mga dulaan alang sa mga bata. 

Kini hinabang gikan sa mga kaamigohan ug alumni, media outfit sa ABS-CBN, Children’s Hour Philippines, Inc., Cultural Center of the Philippines, ug sa the Kalihukang Bisaya ug Panday Tinig Ensemble sa Quebec, Canada, matud pa ni Garcia. 

Mihatag usab sila ug pamulong sa nagkalain-laing topiko nga nagtumong oagtabang sa mga biktima aronn mamentenar ang maayong panglawas ug limpyo nga palibot. Sila naghisgot unsaon pagrekober gikan sa kasakit (trauma), pagpangandam sa katalagman ug paglikay sa mga sakit. 

Ang Silliman nakatabang ug dako pagkuha sa mga suporta sa katawhan sa duha ka milabayng katalagman nga miigo sa probinsya: ang bagyong Sendong niadtong December 2011 ug ang 6.9 magnitude nga linog niadtonng Pebrero 2012. 

Matud ni Garcia, liboan ka mga kaayohan ug salapi ang gidonar sa mga alumni ug kaamigohan ug dagkong organisasyon pinaagi sa Silliman University. 

Karong adlawa (Mayo 11), humanon sa Silliman ang ilang relief operations sa maong lungsod sa Tayasan aron na usab pagtutok sa “reconstruction”.(mbcn/translated by RAC/PIA-Siquijor) 

=============

LTO estriktong mopatuman sa “Helmet Law” sa NegOr

By Rizalie A. Calibo

DUMAGUETE CITY, May 13 (PIA) -- Estriktong ipatuman sa Land Transportation Office (LTO) sa Dumaguete City ang “helmet law” karong Hulyo 30 o unang semana sa Agosto dinhi sa Negros Oriental aron mapromot ang kaluwasan sa mga motorist ning probinsya. 

Sa usa ka multi-sectoral forum, si LTO-7 regional director Raul Aguilos miingon nga ang iyang buhatan adunay katungod pagpatuman sa balaod nga nagmandato sa tanang motorista pagsul-ob ug “standard protective helmets” samtang nagbiyahe. 

Si Aguilos mipasabot nga ang balaod alang usab sa kaayohan sa mga motorista ug mipahimangno niadtong masinupakong drayber sa tugbang nga silot nga ila gayung atubangon. 

Sa ilang hiniusang administrative order, ang LTO ug DTI mimando ug mga lagda ug patakaran sa paggamit sa ensaktong "crash helmets" alang sa pasahero ug drayber sa motorsiklo. 

Matud ni Director Aguilos, ang LTO gimandoan pagpara kon ang pasahero ba o drayber sa motorsiklo nagsul-ob ug helmet. Kinsa kadtong dili makatuman niini magabayad ug P1,500 alang sa unang salaod, P3,000 sa ikaduhang salaod, P5,000 sa ikatulo ug P10,000 (ingon man pagsakmit sa iyang lisensya alang sa ikaupat ug magsunod pa nga mga salaodnon. 

Samtang, ang Department of Trade and Industry (DTI-7) sa Central Visayas nagsugod na sa ilang "mandatory inspection" sa tanang mamaligyaay ug suplayer sa helmet. 

Ang "standard helmet" adunay Product Standard kon PS nga marka alang sa lokal nga produktong helmet, ug Import Commodity Clearance, kon ICC nga marka, sa mga imported nga produkto. 

Si DTI-7 regional director Asteria Caberte miingon nga ang iyang buhatan mitugot sa helmet nga adunay ICC marks, uban sa pagsiguro sa publiko nga dunay igong suplay sa helmet. 

Ubos sa balaod, ang helmet manufacturers ug importers kinahanglan mokuha ug PS license kon ICC mark una siya mamaligya ug mopagawas sa iyang produkto. (mbcn/translated by RAC/PIA-Siquijor)