Friday, May 11, 2012

Kaso sa dengue sa CV misaka
By Hazel F. Gloria

CEBU CITY, MAY 11 (PIA) -- Nagkaanam ug saka ang kaso sa dengue sa Central Visayas kini basi sa kinauwahiang datos nga gipagawas sa Regional Epidemiology and Surveillance Unit (RESU). 

Adunay 6.1 ka porsyento nga pagsaka sa kaso sa dengue gikan sa Enero 1 hangtud Mayo 5 ning tuiga kun ikumparar sa susamang mga buwan sa miaging tuig. 

Si DOH-7 Regional Director Dr. Asuncion Anden nagkanayun nga gikan sa Enero 1 Hangtud Mayo 5, adunay natala nga 2,049 nga mga kaso sa dengue ug 19 niini ang namatay samtang 1,931 ka kaso lang ug 14 ang namatay sa miaging tuig. 

Sa rekord nga gipagawas sa RESU, ang Cebu City maoy nag-una sa listahan nga anaay 1,053 ka kaso ug 9 ang namatay. Gisundan kini sa Syudad sa Lapu-Lapu nga may 115 ka kaso ug 2 ang namatay. 

Ang municipalidad sa Minglanilla ang naa sa ikatulo nga may 110 ka kaso ug 1 ang namatay samtang misunod ang dakbayan sa Talisay nga may 93 ka kaso, walay namatay ug ang ikalima mao ang municipalidad sa Lilo-an nga may 78 ka kaso ug usa ang namatay. 

Nag-edad ug usa ka buwan hangtud 87 anyos ang natala nga mga kaso sa dengue apan kasagaran sa maapektahan mao ang mga 6-10 anyos. 

Sigun pa ni Anden nga bisan paman gipatuman na ang programa sa gobyerno nga mao ang “Aksyon Barangay Kontra Dengue (ABaKaDa)”, aduna gihapuy mga tawo nga gi baliwala ang importansya sa pagpanlimpyo, hinungdan nga daghan gihapun ang makasinati niining sakita. 

Ang direktor sa DOH nagsige ug pahimangnu sa mga katawhan nga permanentehun ang pag limpyo sa palibut ug kanunayun ang pag monitor sa mga sudlanan nga posibleng puy-an sa lamok. (mbcn/hfg/PIA-RO7 & translated by NiƱo Jesryl Maglasang/CNU Intern) 

=============
Pribadong tung-ahan sa Siquijor nakadawat ug P.638M hinabang gikan sa DOLE
By Rizalie A. Calibo

SIQUIJOR, May 11 (PIA) -- Lima ka mga Katolikong pribadong tunghaan sa probinsya sa Siquijor ubos sa Diocese sa Dumaguete ang nakadawat ug mosuma sa P638,000 gikan ‘alternative livelihood program’ sa Department of Labor and Employment (DOLE). 

Ang programa makatabang sa 105 ka mga miyembro ug magtutudlo sa lima ka mga tunghaan sa Assisi High School sa Siquijor, St. Vincent Academy sa Larena, Ave Maria Academy sa Maria, St. Isidore High School sa Lazi, ug St. John High School sa lungsod sa San Juan. 

Ang matag tunghaan nakadawat sa igong pondo alang sa tagsatagsa ka gitakdang proyekto, sumala pa sa report ni Jerome Alam ang information officer sa DOLE-Siquijor. 

Ang Assisi High School nakadawat ug P202,332 alang sa digital photo copier ug ID processing nga patigayon samtang ang St Vincent Academy nakadawat ug P130,868 alang usab sa digital copier ug pagsugod ug school cafeteria. 

Ang Ave Maria Academy aduna usab P90,158 alang sa mga negosyo sa mga galamiton sa eskwela kon school suplies, samtang ang St. Isidore High School adunay P138,9777 alang usab sa digital photo copier ingon man badyet alang sa pagsugod ug school cafeteria. 

Ang St. John High School usab nakadawat ug P100,217 alang sa printing machine ug school supplies ingon man pagsugod usab ug school canteen. 

Ang proyekto, nga gitawag ug Integrated Livelihood Program gilusad sa DOLE uban sa Assisi High School of Siquijor, Incorporated aron pagtabang sa mga magtutudlo sa pribadong tunghaan makaangkon ug dugang kita samtang anaa sila sa ilang serbisyo. 

Kini usab mohatag ug oportunidad sa mga pribadong tunghaan aron mouswag ang matang sa ilang serbisyo alang sa kaayohan sa mga tinun-an. 

Ang Integrated Livelihood Program nagtumong paghatag ug produktibo ug sigurong trabaho sa mga gagmayng empleyado pinaagi sa paghatag kanila ug patigayon negosyo aron madugangan ang ilang kita. 

Ang maong patigayon makatabang kanila tungod kay mokita sila gikan sa abot kon ginansya sa ilang negosyo ingon man makahatag ug dugang trabaho alang sa ilang pamilya. (mbcn/RACalibo/PIA-Siquijor) 

==============
Sec. Alcala miaghat sa mga mag-uuma sa Siquijor pagtanom sa mais ug lagutmonMisaad sa iyang suporta pagpalambo sa produksyon ug pagproseso
By Rizalie A. Calibo

SIQUIJOR, May 11 (PIA) -- Giaghat ni Agriculture Secretary Proceso J. Alcala ang mga Siquijodnong magbalaol pagpananaom ug dugang pang mais ug uban pang lagutmon samtang siya misaad sa iyang suporta aron mouswag ang produksyon ug pagproseso niini. 

Sa iyang pakighinabi atol sa iyang pagbisita sa Isla dili pa lamang dugay, si Sec. Alcala nakamatikod nga posibleng hinungdan nganong nawad-an ug interes ang magbalaol pagpananom ug mais ug mga lagutmon mao ang kakulang sa mga kagamitan ug ekipo nga makapamenos sa ilang kakapoy ug kakuti nga masinati sa pagpananom. 

Tungod niini, misaad si Alcala sa iyang dugang suporta pinaagi sa paghatag ug mga makina sama sa mini-corn mill, mechanized corn sheller ug cassava granulator ug shredder nga iapod-apod sa unom ka mga lungsod sa probinsya. 

Aduna usab ihatag nga maayong klase sa mais italanom gawas sa suporta unya alang sa pagmerkado sa ilang mga abot. 

Gipasabot usab ni Alcala nga ang pagkaon ug mais ug mga lagutmon wala nagsalamin sa kapobrehon tungod kay bisan gani ang ubang mga inilang personalidad sama nila Cong. Lucy Torres-Gomez ug iyang bana nga si Richard Gomez ingon man ang baksidor nga si Manny Pacquiao mas mopili man mokaon sa mais ug lagutmon sama sa kamote kaysa humay. 

Sumala pa ni Alcala nga ang tumong sa iyang pagbisita sa isla mao ang pagsuta sa mga panginhanglanon sa mga mag-uuma ug patubag niini aron masiguro nga dili mausik ang pondo sa kagamhanan. 

“We hope to provide you sufficient food for your daily needs,” (Buot namo nga mahatagan kamo ug igong pagkaon alang sa adlaw-adlaw ningyong panginahanglan), sumala pa niya samtang siya naghangyo usab sa suporta gikan sa mga mag-uuma sa tanang paningkamot sa gobyerno. 

Ang pagbisita ni Alcala sa Isla kalabot sa direktiba ni Pangulo Benigno Aquino pagsuta ug pagpaminaw sa mga isyu ug panginahanglanon sa mga mag-uuma ug mahatagan kini ug igng solusyon ingon man stratehiya aron matubag ang mga isyu. 

Gihimo ang farmers’ forum ug dayalog kauban sa mga mag-uuma ug mga agricultural extension workers sa maong higayon. (mbcn/RAC/PIA-Siquijor)

No comments:

Post a Comment