Mga magtutudlo sa Sugbo gi-andam para sa K to 12 nga programa

By Fayette C. Ri�en

CEBU CITY, Mayo 10 (PIA) -- Gipahigayon sa Department of Education (DepEd) 7 ang kinse ka-adlaw nga training program alang sa 1,027 magtutudlo sa publikong tunghaan sa Sugbo para sa pagpangandam sa K to 12 nga prgrama nga ipatuman karong Hunyo. 

Mga magtutudlo gikan sa pampublikong tunghaan sa dakbayan sa Cebu, Mandaue, Toledo, Bogo, Carcar, Talisay, Danao, ug Naga musalmot sa Mass Training on the Implementation of the K to 12 Basic Education Curriclum for Grade 1 Teachers sa DepEd ECOTECH Center sa Lahug dinhi sa dakbayan sa Sugbo. 

Lakip sa maong training ang pag-preparar sa mga magtutudlo sa Mother Tongue Curriculum kon pagggamit sa Bisayang pinulungan para sa epektibong pagpadangat sa mga leksyon sa mga bata. 

Ang paggamit sa Mother Tongue Curriculum dili lang itudlo sa Grade 1 kundili apil usab sa Grade 2 ug Grade 3 matud pa sa usa ka Dep Ed Memorandum. 

Ang mga partisipante nabahin sa tulo ka grupo. Ang unang grupo sa mga partisipanteng magtutudlo nagsugod sa ilang training niadtong Lunes, Mayo 7 samtang ang ikaduhang grupo magsugod sunod semana ug ang ikatulong grupo sa ikatulong semana sa Mayo. 

Gidahom nga mulungtad ang training karong Mayo 25 isip pagpangandam sa pagsugod sa klase karong Hunyo 4. 

Gidahom usab sa mga opisyales sa edukasyon nga musaka ang gidaghanon sa mga estudyante sa Grade 1 sa pagpatuman sa K to 12 program. 

Sigon pa sa Dep Ed 7, ang gidaghanun sa mga nang-enrol sa Central Visayas lang mukabat sa 10 porsiento matag tuig. (FCR/Nikki Martee Apao/ CNU Communication Intern)