DSWD-7, DPWH nagtambayayong sa paghatag ug trabaho sa mga 4Ps benipisaryo

By Hazel F. Gloria

CEBU CITY, MAY 10 (PIA) -- Nagtinguha ang koordinitor sa Pantawid Pamilyang Pilipino Program (4P’s) sa paghatag ug trabaho sa mga benipisaryo sa maong programa pinaagi sa tabang sa mga ahensya sa gobyerno ug mga pribadong sektor. 

Sigun pa ni Marhadzda Tudtud, koordinitor sa DSWD-7, nga positibo ang resulta sa ilang pagpakig-alayon sa Department of Public Works and Highways (DPWH) alang sa pag-gahin ug trabaho sa mga kabos nga miyembro sa maong programa. 

Dugang pa niini nga anaa nay 112 ka mga benipisaryo sa rehiyon ang gitagaan ug trabaho sa DPWH nga motrabaho sa mga kadalanan ug nanghinaot pa ang ilang ahensya nga aduna pay 129 ka mga trabaho ang ihatag sa DPWH dinhi. 

“Trabahong Lansangan” ang namugna nga programa tali sa kasabutan sa DSWD ug DPWH. Kining programaha maghatag ug higayun sa mga benipisaryo sa Pantawid Pamilyang Pilipino Program (4P’s) aron ma-okupar ang 20 porsyento sa tibuok trabahante sa DPWH alang sa pagpalambo ug pag-ayo sa mga kadalanan. 

Hinoun, ang tagaan ug higayon nga makatrabaho mao kadtong mga benipisaryo sa 4P’s nga anaa manimuyo dapit sa mga lugar nga tukuran sa mga proyekto sa gobyerno. 

Ang mga benipisaryo sa Pantawid Program nga makatrabaho sa DPWH makadawat ug P250.00 matag adlaw sud lamang sa tulo ka buwan apan mamahimu gihapun kini nga makatrabaho ug balik sud sa tulo ka buwan.(mbcn/hfg/PA-RO7 & Nino Jesryl Maglasang/CNU Intern)