DPWH-7, migahin ug kapin P800M alang sa stategic tourist destination projects

CEBU CITY, May 29 (PIA) -- Ang Department of Public Works and Highways migahin ug P 857,365M alang sa pagpalambo sa turismo diri sa Central Visayas. 

Kining proyekto molangkub sa pagpaluag ug pagpakonkreto sa mga kalsada nga mopadung ngadto sa mga turismong dapit. 

Pipila sa mga napiling tourist destination projects nga ilang pagahimuon mao ang pagkonkreto sa Cebu North Coastal Road ug Panglao Island Circumferential Road; pagpaluag sa Mactan Circumferential Road apil ang taytayan, pagtukod ug kalsada'g taytayan sa Carmen, ug laing pang unom ka mga proyekto diri sa rehiyon. 

"Unahun jud ug pa-improve ang mga dalan because of the tourist destinations", tataw ni Marie Mingnon Nillamasa, Informarion Officer sa DPWH-7. 

Miawhag ang DPWH sa tanang lokal opisyal sa distrito nga gisakopan sa pagpaluag ug pagpakonkreto sa kalsada nga mukooperar aron sa makalikayan ang mga umaabot nga problema ug mutabang aron sa mahumang malampuson ang mga proyekto. 

Sa pagkakaron, ang pag-ayo sa taytayan sa Marcelo Fernan ug ang Naga-Carcar Road Widening ang ilang masugdan na nga proyekto. 

Ang Marcelo-Fernan Bridge gikatakda nang ayuhon karung umaabot Hunyo 4 diin 16 sa 18 ka mga-expansion joints ang tarungon nga naglangkob sa pagtangtang sa gubang rubber expansion joints. 

Samtang ang Naga-Carcar Road Widening gisugdan kagahapong adlawa nga gibana-banang mahuman karung bulan sa Disyembre. (mbcn/hfg/PIA-RO7 & Mayette Baring/CNU Intern)