Cebuano news: LGU management team nipaubos og orientation pinaagi sa EQUIP-CEBU Project

CEBU CITY, May 25 (PIA) -- Ang lokal nga kagamhanan sa lungsod sa Liloan uban usab sa pakigtambayayong sa Department of Education (DepEd), Ramon Aboitiz Foundation Inc. (RAFI), Educational Development Unit, ug Synergeia Foundation nipahigayon nga tunga sa adlaw nga pre-organizational orientation ngadto sa EQUIP-CEBU Project Management Team niaadtong miaging Abril 25 didto sa Panfil Municipal Market sa lungsod sa Liloan. 

Kini nga kalihukan gipangulohan mismo ni Tanya Flores, RAFI senior program officer for Education, ug Reve Gabriel, project assistant. 

Ang proyekto nga RAFI EQUIP-CEBU o Educational Quality Improvement pinaagi sa Community Empowerment and Capacity Building ubos sa ilang Educational focus area gitumong aron pag palambo sa kalidad sa edukasyon pinaagi sa pagpausbaw sa kapasidad sa mga hingtungdan sa pagdumala sa tulunghaan nga gipunting sa upat ka mga nag kalian-lain nga bahin sama sa school governance, infrastructure, capacity building, access and delivery of education. 

Ang munisipalidad sa Liloan sa amihanang bahin sa Sugbo usa sa mga tulo ka pilot municipalities alang ning naasoy nga proyekto nga naglakip sa Carcar ug Asturias nga nag representar sa amihanan, habagatan ug kasadpan nga bahin sa Sugbo. 

Gikataho nga ang nahisgutan nga mga lungsod napili gumikan sa ilang strategic nga lokasyon ug kaandam paghangop nga mamahinong parte sa naasoy nga proyekto. 

Ang Project Management Team (PMT) nga gitukod sa matag munisipyo aduna gayo’y importante nga papel gumikan kay kini ang nangulo sa mga proyekto alang sa pagpalambo sa mga tulunghaan ug kini usa ka multi-sectoral body nga gilangkoban sa mga opisyales sa kagamhanan, school board, , DepEd, religious sector, business sector, health sector, parent-teacher's association, barangay, RAFI, ug uban pa nga mga hingtungdan . 

Ang PMT sa munisipyo sa Liloan adunay onse ka mga partisipante nga gilangkoban sa mga nagkalain-lain nga sektor gikan sa lungsod. 

Isip kabahin sa nahisgutan nga kalihukan ang mga partisipante gitagaan og kahigayonan sa pagsuwat sa mga butang nga alang kanila wala sa sistema sa edukasyon ug mga tulunghaan karon. (AS/PIA-7, CEBU)