DILG-7 nag-aghat sa mga LGUs pagpanday og disaster preparedness plans

By Amorganda A. Saludar

CEBU CITY, May 25 (PIA) -- Ang Department of Interior and Local Government (DILG) dinhi sa Tunga - tungang Kabisay-an nagtukmod sa mga local government units sa pagpanday og ilang kaugalingon nga Disaster Preparedness Action Plan taliwala sa kasamtangan nga hulga sa climate change. 

Gumikan niining kusganon nga lakang pagpahimangno sa LGUs kabahin sa ilang responsibildad, ang DILG-7 mopahigayon og regional summit nga gitawag og "Tapatan on Disaster Preparedness and Climate Change Adaptation: A Call to Action” karong Biyernes Mayo 25 adto sa Cebu International Convention Center in Mandaue City. 

Sumala pa ni Assistant DILG 7 Regional Director Elias F. Fernandez nga gikinahanglan nga mapangandaman ang matag unsa nga klase sa kalamidad ingon man iya usab nga giklaro nga gikinahanglan gayod ang pagpanguna sa proseso sa paghan-ay sa mga tahas ug mga responsibilidad alang niadtong mga gimanduan ug gitahasan pagmugna og disaster preparedness. 

Dugang pa ni Fernandez nga ang grabe nga kondisyon sa panahon gumikan sa climate change seryoso gayod nga hulga tungod kay ang uban nga mga dapit nga dili sagad makasinati og kalamidad kaniadto grabe na karon nga naapektahan sa mga kalamidad sama sa Cagayan de Oro ug ang mga lungsod sa Negros Oriental nga bag-ohay lamang nakasinati og linog. 

Gipadayag usab niya nga base sa Republic Act No. 10121 o naila nga Philippine Disaster Risk Reduction and Management Act of 2010 ug Republic Act No. 9729 or the Climate Change Adaptation of 2009 gimanduan ang mga LGUs nga magmugna og ilang kaugalingon nga action plan alang sa on disaster preparedness ug climate change adaptation and mitigation. 

Giklaro niya nga ang DILG mohingusog gayod pag monitor kung ang mga LGUs nituman ba sa RA 10121 and RA 9729 sanglit mao usab kini ang inasyatibo sa ahensya hingusgan ang pwersa sa disaster preparedness sa mga LGU taliwala kalamidad nga nasinati sa ubanng parte sa nasud. 

Gikataho nga mokabat unya ngadto sa 600 ka mga partisipante diin kadaghanan niini mga local chief executives uban usab ang ilang mga city, municipal or provincial disaster coordinating officers uban pang mga hingtundan ang gipaabot nga motunga usab atol ning maong kalihukan. 

Ang Tapatan Roadshow dinhi sa rehiyon pagatambungan mismo ni DILG Secretary Jesse Robredo isip pinasidunggan nga dinapit. (AS/PIA 7, Cebu) 

=============

Lungsod sa Sugbo nidugtong sa katawhan pinaagi sa modernong teknolohiya

By Amorganda A. Saluda

CEBU CITY, Mayo 25 (PIA) -- Ang lokal nga kagamhanan sa lungsod sa Dalaguete habagatang bahin sa Sugbo nidugtong sa mga Dalaguetnons pinaagi sa paggamit sa modernong teknolohiya sa komunikasyon sama sa wireless broadband connection alang sa internet. 

Ang lungsod sa Dalaguete nagtanyag ngadto sa ilang mga resisdente og libre nga wireless connection nga mahimong makuha sa municipal plaza sa nahisgutang lungsod ug pinaagi usab sa retail connection (menudo) nga gitanyag sa munisipyo gikan usab sa network nga nagsuplay niini og internet connection. 

Ang gitanyag nga koneksyon pinaagi sa retail o menudo susama lamang sa mag paload og mobile phone credits, diin sa matag P25 mahimo na nga makagamit sa koneksyon suklod sa tulo ka oras, sa matag P50 moabot na kini ngadto sa unom ka oras ug P80 sa napulo ka oras. 

Ang mga mopahimulos niini nga serbisyo pagatagaan lamang og ticket diin nahasulat ang connection password aron sila makagamit na sa internet connection. 

Gibutyag ni Dalaguete IT Consultant, Danny Russel Lumayag nga ang konsepto niini nga proyekto namugna niadto pang Nobyimbre sa tuig 2010 u niadtong Pebrero sa miaging tuig natuman ang nahisgutan nga proyekto. 

Dugang pa Lumayag nga ang nag-unang tumong niini nga proyekto mao ang paghatag og kahigayonan sa mga Dalagueton nga makigkonektar sa ilang mga minahal sa kinabuhi nga atua sa gawas sa nasud ug gawas sa lungsod ingon man aron usab mahatud ang opportunidad sa patigayon sa maong lungsod kinsa gikinahanglan kaayo alang sa kalambuan niini ug aron usab mapalambo ang pamaagi sa komunikasyon dinhi. 

Matud pa usab niya nga ang mga katawhan sa Dalaguete makasulti gayud kung unsa ka mahinungdanon kini nga proyekto ngadto kanila ug gikan sa implementasyon niini mga usa na ka tuig ang nakalabay ubay ubay na nga mga katawhan dinhi ang nakabenipisyo niini nga serbisyo gumikan kay aduna na sila’y komunikasyon sa ilang mga minahal sa kinabuhi nga atua sa halayo ingon man sayon na lang usab alang kanila ang pagpakigdugtong sa lokal nga kagamhanan sa lungsod. 

Si Dalaguete Information Officer Rydal Cisneros nagkanayon nga ang naasoy’ng nga proyekto usa sa mga nag –unang taras sa kasamtangan hut-ong sa mga opisyales sa lungsod aron paghatod kooperasyon ug pinaghiusa ingon man usab aron mapalambo ang komunikasyon tali sa mga katawhan sa Dalaguete ug sa lokal nga kagamhanan sa lungsod. (RMN/AS-PIA 7, Cebu)