Paglusad sa “Basuraskwela”

CEBU CITY, May 24 (PIA) -- Ang Cebuano Youth Ambassadors (CYA), usa ka bag-ong na-organisa nga CYA-Tingub ug ang inahan sa Tingub Urban Poor Community, mipailaila sa socio-environmental nga proyekto nga “Basuraskwela.” 

Ang Basuraskwela nag-gikan sa duha ka pulong; Basura ug Eskwela. Kini nagtinguha sa pag-recycle sa mga naggamit na nga mga tarpaulins ngadto sa usa ka mamugnaon ug mapuslanong mga gamit sama sa mga bag, pitaka, ug uban pa nga mamahimong mabaligya. Ang kwarta nga makuha gikan sa mabaligyang mga produkto paga-gamiton arun sa pagpa-eskwela sa mapiling benepisyaryo niini. Gibana-bana nga muabot sa 50 ka mga bata ang mapa-eskwela, elementarya man o hayskul. 

Usa sa mga nag-unang tighatag sa mga tarpaulins mao ang Junior Cater International-Cebu, usa ka organisasyon sa mga negosyante ug mga political leaders. 

Lakip sab sa maong proyekto mao ang duha ka supplementary nga mga aktibidad: Basuraskwela Brigada ug Basuraskwela Barkadahay. 

Ang Basuraskwela Brigada ginapahigayon kausa sa usa ka buwan diin ang mga volunteers niini nagagikan sa nagkadaiyang mga unibersidad ug mga organisasyon dinhi sa Dakbayan sa Sugbo. Sila magapahigayon og cleaning program sa ilang napiliang eskwelahan isip ilang benepisyaryo. Ang ilang kinaulahiang Brigada didto sa Gothong High School kauban ang mga estudyante, mga ginikanan ug uban pang volunteers. 

Sa laing bahin, ang Basuraskwela Barkadahay nag-adbokar pinaagi sa mga storytelling sa mga bata. Plano nila nga mubisita sa 80 ka barangay sa Cebu City. Gisuportaan kini sa Cebu City Library ug sa City Nutrition. 

Ang executive director sa CYA ug project chair sa Basuraskwela, nga si Paolo Martin Saberon, kauban ang mga myembro niini nagplano sa paglusad sa maong programa karung umaabot nga Hunyo 30, gumikan kay kini natukod usa ka buwan pa ang milabay. (PIA-7/HFG/Maila L. Paguntalan/CNU Communication Intern)