3 ka barangays sa Sugbo makakuha ug limpyong tubig imnonon

By Fayette C. Ri�en

CEBU CITY, Mayo 17 (PIA) -– Human sa dugay nga pagpa-abot, ang mga lumulupyo sa barangay Pit-os, Bacayan ug Talamban dinhi sa dakbayan sa Sugbo makaangkon na ug imnonong tubig gikan sa Metropolitan Cebu Water District (MCWD). 

Matod ni MCWD Assistant General Manager for Technical Services Michael Balazo, gilunsad sa MCWD niadtong Abril 13 ang Pit-os-Bacayan-Talamban Water Supply Project nga gidayag pinaagi sa usa ka groundbreaking ceremony ug presentasyon sa giingong water service project.

Sa pagkakaron, ang mga lumulupyo sa Bacayan mamalit ug tubig gikan sa mga pribadong suplayer sa P40 matag kubiko nga mas doble pa kaysa singil sa MCWD, sigon pa ni Bacayan Barangay Captain Armando Borces. 

"Luoy kaayo ang mga residente" ingon pa ni Borces. 

Naggahin ug P54 milyon ang MCWD alang sa proyekto nga i-implementar sa New Culion Builders alang sa pag-apod-apod sa 12,000 ka kubiko nga tubig matag adlaw sa tulo ka-barangay matod pa ni Balazo. 

Ang pagbutang sa tubo sugdan na sa dili madugay ug kini gilauman nga mahuman sa Disyembre 9 karong tuiga. Kung hingpit nga makumpleto, 74 ka-stub outs ug pito ka-water hydrants ang magamit na. 

Lakip sa tuburan sa tubig ang mga atabay sa Talamaban sa MCWD ug mga posibleng pribadong tinubdan pinaagi sa linangkobang venture contracts, sigon ni MCWD General Manager Armando Paredes. 

Pasabot pa ni Paredes nga nadilatar ang implementasyon sa proyekto gumikan sa kakuwang sa tinubdan sa tubig. 

"Since a decade ago, MCWD has been exploring possible sources of water to supply to residents of northern Cebu City. (Napulo ka tuig sukad sa una, nag-usisa ug posibleng tinubdan sa tubig ang MCWD para i-suplay sa mga lumulupyo sa amihanang bahin sa siyudad sa Sugbo)," dugang pa niya. 

Ang Pit-os ug Bacayan puro naay volcanic geologic formation, diin imposible kaayo nga makakita'g tubdanan sa tubig. Ang Talamban ra ang naay tuburan sa tubig sanglit hinimo sa limestone ang yuta, ingon pa ni Paredes. 

Matod pa sa MCWD, pinaagi sa exploration works ug well drilling nakaplagan ang upat ka-atabay sa Highway 77, Tigbao, Cadauhan ug Nasipit, tanan sa Talamban. 

Ang upat ka-atabay hingpit nga nakumpleto niadtong 2006, 2009, 2010, ug 2011 ug ang usa ka-atabay magamit na diin kini mukabat ug 1,540 ka kubiko kada-adlaw, asoy pa sa MCWD. 

Gisiguro ni Paredes nga dul-it sa MCWD ang paghatag ug imnonong tubig sa mga katawhan sa ilang mga gisakupang lugar. 

Ang MCWD ug New Culion ning-apila sa publiko nga magpailob usa sa kahasol sa trapiko sa kadalanan tungod sa pagkubkob nila sa kadalanan alang sa maong proyekto. 

Alang sa mga lumulupyo sa mga subdibisyon sa maong lugar nga gustong mo-konekta sa MCWD para sa pagpa-usbaw sa ilang suplay sa tubig, ang deveoper o homeowner's association gikinahanglang iintriga sa MCWD ilang water system. (FCR/Nikki Martee B. Apao/CNU Communication Intern/PIA 7, Cebu).