PIA-7 ug DAR-7 nag 'potting' session didto sa DENR nurseryaron kini matamnan

By Amorganda A. Saludar

CEBU CITY, Abr. 1 (PIA) -- Ang Philippine Information Agency (PIA-7) dinhi sa Central nakig-uban sa Department of Agrarian Reform (DAR-7) sa usa ka 'potting' session o pagpanulod og mga tabunok nga yuta ngadto sa mga gagmay nga plastic aron kini pagatamnan sa mga seedlings nga anaa nahimutang sa Department of Environment and Natural Resources (DENR) 7 Regional Nursery sa Lahug, Cebu City niadtong Marso 27. 

Ang maong kalihukan kabahin sa kasaulogan sa Buwan sa mga Kababayen-an nga adunay tema’ng “Women Weathering Climate Change: Governance and Accountability- Everyone’s Responsibility.” 

Si PIA-7 regional director Minerva Newman nangulo sa maong kalihukan diin natigum gayud ang 500 plastic bags sulod lamang sa dul-an sa duha ka oras. Suma total ang PIA ug DAR nakatigum og kapin sa 3000 plastic bags nga puno sa tabunok nga yuta. 

Matud pa sa sinaligan sa nursery nga si Ener Manatad ang natampo nga kahago sa duha ka ahensya dako na kaayo og ikatabang sa tumong sa DENR nga pun-on ang 1000 sq.km nga luna sa nursery pinaagi sa 55 ka libo nga binhing punoan sa mga kahoy (fruit ug forest seedlings ) sulod sa mga plastic pot. 

Sa kasamtangan ang DENR regional nursery nakatigum na og 35 ka libo nga mga plastic bags nga may sulod nga mga tabunok nga yuta lakip na niini ang natampo sa PIA ug DAR diin ang uban niini natamnan na og mga binhing punoan. 

“Dako gyud kaayo og ikatampo ang nahuman karon nga mga potted plastic bags kay daghan-daghan pa gyud ang atong kuwang," matud pa ni Manatad (MBCN/AS, PIA-CEBU)