Siquijodnong mag-uuma kinatas-an ug abot sa CV

SIQUIJOR, Mar 29 (PIA) -- Sumala pa ni Gubernador Orlando A. Fua Jr. sa iyang State of the Province Address (SOPA) dili pa lamang dugay nga Ang Siquijodnong mag-uuma adunay pinakadaghang abot sa tibuok Central Visayas. 

Si Fua miingon nga ang Siquijor, sa gidak-on nga 330 ka kilometro quadrado duwende kon itandi sa Negros nga 5,385 ka kilometro kuadrado o sa Bohol ug sa Cebu nga sobra ug tag 4,000 ang kadak-on. 

Ang Siquijor aduna lamang kini 619 ka hektaryang basakan, itandi sa Negros nga 145,000 hektarya ug sa Bohol nga 185,000 ka hektarya. 

“Apan unsay kakulang sa iyang gidakon iyang gihulipan sa kakugi ug mangialamon sa iyang mga mag-uuma, tungod kay sa tanang mag-uuma sa rehiyon, ang magbabaol sa Siquijor maoy kinatas-a ug ani,” matud pa ni Fua. 

Sa kada hektarya nga iyang gitikad, 73 ka bakid humay ang iyang giani, samtang sa Bohol 61 da, ug sa Negros 57 da, dugang pa niya. 

Siya midugang nga ang ang mga Siquijodnong magbabaol miani ug 38,860 ka bakid niadtong 2009, 40,800 niadtong 2010, ug 45, 340 niadtong 2011 busa bisan pa nga nag-anam ug kadaghan ang mga Siquijodnon, naga-anam usab ug us-us sa average nga 13,737 ka bakid ang commercial rice imports sa miaging tulo ka tuig. 

“Tungod ni kay nag-anam kadaghan ang ani sa atong mga rice farmers by an averge of 7.5 per cent per year or 3,240 ka bakid kada tuig,” si Fua miingon. 

Dugang pa usab niya nga ang gilapdon sa mga basakan sa Siquijor nag-anam ug uswag ug 6% kada tuig kon 19 ka hektaryang madugang sa gidak-on nga gitikad. 

“Ug magpadayon ning trend sa pag-uswag, dili damgung lisud tumanon nga walay 20 ka tuig gikan karon, pulos na atong abot ang kan-on sa atong mga tawo,” matod pa sa Gobernador. (mbcn/RAC/PIA-Siquijor)