DENR-Siquijor nakab-ot ang 100% target sa NGP

By Rizalie A. Calibo

SIQUIJOR, Apr. 3 (PIA) -- Siyento porsyentong nakab-ot sa Department of Environment and Natural Resources (DENR)-Siquijor ang target sa national greening program (NGP) niadtong miaging tuig sa isla sa Siquijor. 

Kini sumala ni Provincial Environment and Natural Resources (PENRO) officer Antonio Cabrido nga miangkon nga natamnan ug nagkalain-laing kahoy ang lukop nga 250 ka hektaryang target sa NGP niining isla. 

Si Cabrido usab miingon nga kinahanglan ang pagpahiuli ug pagproteher sa mga kakahoyan gikan sa kabukiran ug kapatagan aron mahina-hinayan ang epekto sa pag-usab-usab sa klima kon climate change. 

Dugang usab niya nga usa ka ang-ang padulong sa kalamposan sa programa batok sa climate change mao ang 'teamwork'. 

"Teamwork is the name of the game for climate mitigation and adaptation measures to save our beautiful island" (Teamwork mao ang ngalan sa dula alang sa pagmitigar ug paghimo sa mga paagi pagluwas sa atong maanindot nga isla), matud pa niya. 

Sumala pa niya ang matag usa kinahanglan mohimo ug dinaliang lakang pagproteher sa kalikupan aron usab pagasundon sa bag-ong henerasyon. 

Ang PENRO hinuon mipasalamat sa publiko sa ilang suporta ug kooperasyon pagkab-ot sa maong tumong kon target. 

Sa kasamtangan, ang DENR usab mipadaghan ug mga kahoy nga Balite nga nailang maayong gigikanan sa tubig ug mahimong magamit alang sa umaabot nga watersheds sa probinsya . (mbcn/rac - PIA 7, Siquijor)

============

LGUs mopatigayon ug lakang sa agrikulturang kalamboan

DUMAGUETE CITY, April 3 (PIA) -- Sa dili madugay makaangkon na ang probinsyal ug munisipal nga kagamhanan sa Negros Oriental ug kaugalingong "roadmap" alang sa agrikulturang kalamboan human mipatigayon ang Department of Agriculture (DA) sa Rehiyon7 ug workshop alang sa mga agricultural technologists (ATs). 

Ang workshop nagtudlo sa mga technologists gikan sa mga lokal nga kagamhanan sa pagpatigayon ug "agricultural roadmap" nga moila sa datos sa humay, mais, high-value crops, kahayupan ug uban pang datos pang-agrikultura sama sa abot sa matag dapit. 

Nagpaluyo niini mao ang paghiusa sa mga inisyatibo ug planong pangkalamboan sa agrikultura sa matag munisipalidad ngadto sa provincial commodity program road map, sumala pa ni Nittz Bangay, information officer sa Provincial Agricultural Office. 

Ang kalihukan usab makapausbaw sa kahibalo sa mga AT’s sa datos sa agrikultura sa ilang dapit. 

Si Bangay midugang nga ang maong road map mopakita usab sa "commodity self-sufficiency, profitability ug productivity" sa sektor sa agrikultura sa ilang dapit. 

Kini usab makahatag ug oportunidad aron ang kagamhanang lokal moimplementar sa mga paagi pagdumala, stratehiya ug pondo aron makab-ot ang ilang gitumong nga abot, dugang pa niya.(mbcn/Translated into Cebuano by RAC/PIA-Siquijor)