Bise Mayor sa Sugbo nangulo sa kampanya sa Earth Hour

By Amorganda A. Saludar

CEBU CITY, April 4 (PIA) -- Si Cebu City Vice Mayor Joy Augustus Young nangulo sa mga opisyales sa siyudad sa Sugbu ug uban pang multi-sectoral nga mga mitambong sa ceremonial power switch-off isip pagtamod sa kasaulogan sa kampanya sa Earth Hour nga gipahigayon niadtong Marso 31, sa Plaza Independencia. 

Ang bagang duot sa mga nitambong niadtong nahisgutan nga kalihukan naggikan sa Aboitiz Group of Companies uban sa kapin 330 ka mga partisipante nga naglakip sa Visayan Electric Company ug Metaphil Export. 

Gibana-banang kapin sa 500 ang nidugok sa Plaza Independencia diin kasagaran kanila naggikan sa mga nagkadaiyang grupo sa mga kababayen-an ug non-government organizations. Gatosan usab ka mga mananan-aw ang nihunong pagtuyo aaron pagsaksi sa hamubo nga programa saw ala pa ang aktwal nga one-hour power switch-off. 

Nitambong usab aron pagpakita sa ilang suporta sa kawsa pag konserbar sa enerhiya og pag-amping sa kinaiyahan ang mga Cebuana beauty queens. Ug sa samang higayon nihatag usab sila sa ilang panumpa pagtampo alang sa pagpreserbar sa kinaiyahan. 

Untop 8:30 sa gabii si Cebu City Vice Mayor Joy Augustus Young uban nila ni Cebu City Representative Cutie del Mar, Aboitiz Group of Companies President and CEO Eramon Aboitiz ug World Wide Fund-Philippines Climate Change Director Atty. Gia Ibay nangulo sa dungan lukop nasud nga seremonyas sa one-hour power switch off dinhi sa Sugbo. 

Samtang nilukob ang hingpit nga kangitngit sa Plaza Independencia gatusan ka mga dinagkotan nga sky lanterns ang gipalupad sa kahanginan. Ang plaza naghayag lamang pinaagi sa mga kandila nga gipasiga sa mga tawo sa maong dapit. 

Matud pa ni Aboitiz nga ang ginagmay lamang nga aksyon susama sa kampanya sa Earth Hour makatampo na og dako sa pag konserbar sa enerhiya ug pagprotiher sa kinaiyahan. 

Ang Aboitiz usa mga nag-unang sponsor sa Earth Hour dinhi sa Sugbo. 

“Let us start to develop the habit of energy conservation and environmental protection. Let us stand united and be one in our goal to develop the environment for a brighter future,” sumala pa ni Aboitiz.

Sa wala pa ang ceremonial power switch-off didto sa Plaza Independencia ang mga sumasalmot nipahigayon usa og ‘Walk for Earth Hour’ nianang mga 5:30 sa hapon nga nanukad sa Fuente Osmena hangtod na ngadto sa plaza. 

Ang siyudad sa Sugbo usa sa mga dagkong tulo ka siyudad sa nasud uban sa Davao City Makati City diin gipahigayon ang dungan nga seremonyas sa power switch-off. 

(AS/PIA 7, Cebu) 

============

45 ka LGUs nilagda og kasabutan alang sa program batok kakabus

By Amorganda A. Saludar

DUMAGUETE CITY, April 4 (PIA) -- Mokabat ngadto sa 45 ka mga local government units (LGUs) dinhi sa Central Visayas ang nilagda sa kasabutan nga maghiusa alang sa implementasyon sa Pantawid Pamilyang Pilipino Program (4Ps) sa ilang mga kalungsuran. 

Tungod niini kapin na sa 148,000 benipisyaryo panimalay ang nadugang sa kasamtangang 61,700 nga kinatibuk-ang ihap sa rehiyon ngadto sa dul-an 210,000 ka mg a benipisyaryo sa 4Ps. 

Ang unang implementasyon sa Set 5 sa Negros Oriental napun-an sa lima ka mga lungsod -- Bacong, Dauin, Valencia, Dumaguete, ug Tanjay City uban sa 6,580 ka mga panimalay. 

Sumala pa ni Information Officer Aileen Lariba sa DSWD7 nga ang inisyal nga kalambuan sa sayong implementasyon sa naasoy’ng programa sa Negros Oriental magpadayon sanglit ang mga mayores sa matag dapit personal nga nitambong sa maong kalihukan ug midawat sa maong programa uban sa hugot nga suporta sa probinsyal nga kagamhanan pinaagi sa presensya sa Provincial Social Welfare Officer, Alicia Lagarde, sa ngalan ni Governor Roel Degamo. 

Ang implementasyon sa Pantawid Pamilya niabot na usab ngadto sa syudad sa Tagbilaran sa Bohol pinaagi sa kapin 17 ka mga munisipalidad nga naglangkob sa Balilihan, Calape, Catigbian, Loon, Clarin, San Isidro, Sagbayan, San Miguel, Talibon ubos sa una ug ikaduha’ng distrito. 

Sa ikatulo nga distrito gilangkoban kini sa lungsod sa Anda, Batuan, Candijay, Duero, Guindulman, Lila, Sierra Bullones, and Valencia nga aduna’y 17,836 ka mga panimalay. 

Ang probinsya sa Sugbo ang nitala ug pinakadaghan nga napuno’ng mga benipisyaryo gikan sa una hangtod na sa ika lima nga Distrito nga gilangkoban sa lima ka mga siyudad ug 16 ka mga munisipyo. 

Gikataho nga ang mga siyudad naglakip sa Talisay, Toledo, Bogo, Danao ug Carcar samtang ang mga munisipyo naglakip sa Naga, Alcantara, Argao, Dalaguete, Moalboal, Ronda, ug Santander. Ang uban pa nga mga lungsod naglakip sa Aloguinsan, Balamban, Pinamungahan, Medellin, Santa Fe, Carmen, Pilar, San Francisco, ug Tudela. 

Ang panagpinirmahay sa MOA gipahigayon didto sa grand ballroom sa Sarossa International Hotel nga gitambongan mismo ni DSWD’s Undersecretary Mateo Montano. 

Ang mensahe ni Montano nagkanayon nga “We will work together in breaking the inter-generational cycle of poverty by sending these children to school and providing them access to health services."

Ang matag mayor nilagda sa kasabutan pagsagop sa maong programa ug sila usab ni komiter paghatag og mga gikinahanglan nga suplay sama alang panglawas ug edukasyon sama sa health center workers, classrooms, opurtunidad sa panginabuhian ug ang labaw nga gikinahanglan nga monitoring kung nakasunod pa ang mga benipisyaryo sa patakaran sa programa. (mbcn/AS-PIA 7, Cebu)