Pampubliko, pribadong sektor nilagda og kasabutan alang sa Anti-Human Trafficking

CENTRAL VISAYAS, Apr. 11 (PIA) -- Atol sa 1st quarter nga panagtagbo sa Regional Development Council (RDC-7) dinhi sa Central Visayas ang mga nagkadaiyang government units ug mga pribado nga sektor nilagda sa kasabutan (MOA) nga may kalambigitan sa Anti-Human Trafficking. 

Kini human gikataho sa Regional Anti-Trafficking Task Force (RATF) ug Regional Sub-Committee on Gender, Anti-Trafficking and Violence (RSC-GATV) nga nisaka ang gidaghanon sa kaso ug kalihukan sa trafficking ug cyber pornography dinhi sa Central Visayas. 

Tungod niini nga katuyoan ang mga hingtungdan nga ahensya sa gobyerno ug unit kinahanglan nga mopatuman sa mga programa ug proyekto nga protiher ug mopugong sa mga kabatan-onan ug kababayen-an nga mabiktima sa trafficking ug mabaligya ngadto sa mga lungga sa cyber sex. 

Unod sa maong kasabutan nga ang Department of Foreign Affairs (DFA) mogama og mga magamit nga mga kagamitan ug pasilidad tabok nasud alang sa mga mabiktima sa trafficking ingon man mangita og mga pamaagi aron mapausbaw ang ayuda ug hinabang aron unya sa ingon mahanaw ang mga kalihukan may kalambigitan sa trafficking pinaagi sa networking sa uban nga mga ahensya sa gobyerno gawas ug sulod sa nasud. 

Hilabi na gayud unya ang DFA kinahanglan nga mopatuman og mga gikinahanglan nga pamaagi alang sa istrikto nga pagpatuman sa Machine Readable Passports aron pagprotiher sa integridad sa Philippine passports, visas ug uban pa nga mga dokumento pambyahe aron maminosan ang insidente sa trafficking. 

Ang Department of Social Welfare and Development (DSWD) mopatuman og mga programa alang sa rehabilitasyon ug proteksyon sa mga biktima sa trafficking. Mohatag usab sila counseling ug temporaryo nga kapoy-an sa mga biktima ug mohatag usab sila og kalig-onan sa mga NGOs sa pagtukod og mga centro ingon man mga programa alang pagpanginlabot ngadto sa komunidad. 

Ang Department of Labor and Employment sa laing bahin mosiguro sa istrikto nga pagpasunod sa mga balaod kalabot sa pamuo ug mga regulasyon sa pag monitor, pagdokumentar ingon man pagtaho sa mga kaso sa human trafficking nga naglambigit sa mga employers ug labor recruiters. 

Ang Cebu, Bohol, Negros Oriental, ug Siquijor, ingon man mga urbanisado nga siyudad sa probinsya sa Sugbo magmonitor ug modokumentar sa mga kaso sa trafficking sa ilang tagsa tagsa ka mga lugar. 

Ang mga nahisgutan nga mga LGUs mopahigayon usab og mga kampanya (information campaigns) batok human trafficking pinaagi sa katukoran sa Migrants Advisory and Information Network (MAIN) desks ngadto sa lungsod, siyudad ug mga probinsya pinaagi sa koordinasyon sa DILG, PIA, Commission of Filipinos Overseas (CFO), NGOs, ug uban pa nga mga hingtungdan nga ahensya. 

Ang mao gihapon nga kasabutan nanawagan usab sa Philippine National Police (PNP) isip nag-unang ahensya nga tigpatuman sa balaod sa pagpahigayon ug pagpaniid, imbestigasyon ug pag-aresto sa mga indibidwal o grupo nga gikatahapan nga nahilambigit sa trafficking. 

Ang Department of Interior and Local Government (DILG) momugna og kampanya alang sa sistematiko nga impormasyon ug pagpugong ingon man pagmintenar sa databank alang sa epektibo nga pag monitor, pagdokumentar ug prosekusyon sa mga kaso sa human trafficking. 

Sa katapusan ang Department of justice (DOJ) moseguro sa prosekusyon sa mga akusado sa human trafficking. Sila usab ang momugna og mga mekanismo alang sa free legal assistance niadtong mga biktima uban sa koordinasyon sa DSWD, IBP ug uban pa nga mga NGOs ug mga boluntaryo nga pundok. 

Ang chair sa RPOC-7 nga si Bohol governor Edgar Chatto malaumon nga pinaagi unya sa nahisgutan nga MOA ang trafficking sa mga kababayen-an ug kabatan-onan dinhi sa Central Visayas mokunhod kun dili man gani hingpit nga mahanaw. 

Matud pa ni Chatto nga dili gayud ikalimod nga bisan unsa nga pagpanlimbasog alang sa kalambuan naka angkla sa kalinaw, seguridad ug proteksyon sa atong mga kababayen-an ug mga kabatan-onan. (mbcn/AS/PIA-CEBU) 

============

Mga Pinoy nga negosyante ika-upat nga pinaka-'most optimistic'

CEBU CITY, APRIL 11 (PIA) -- Ang mga kadagku-ang lider sa negosyo sa Pilipinas gikataho'ng ika-upat nga pinaka-malaomon kung itandi sa ilang mga kaatbang sa ubang nasod diin ang gobyerno naningkamot nga mamahimong sayon ang pag-negosyo sa mga tigpamuhunan sa mga nasud. 

Ang pinaka-ulahiang taho sa Grant Thornton International Business Report nagpakita nga taas ang 'business optimism' sa Pilipinas, gani gilupig ang mga dagkong economiya sa kalibutan, ang United States ug China. 

Ang mga resulta sa survey nagpakita nga 80 porsiyento sa mga Pilipinong nitubag sa survey ang malaomon sa ilang pamalandong sa dagan sa ekonomiya sulod sa umaabot nga 12 ka buwan. 

Ang pigura mao ang pinakataas sunod sa Peru nga adunay 90%, Brazil-86% ug United Arab Emirates-84 porsiyento. 

Sunod sa Pilipinas mao ang Georgia nga adunay 78%, India-74%, Chile-68%, Germany-64%, Mexico-62%, ug Turkey nga nakakuha ug 60 porsiyento. 

Sa US ug China, aduna'y 46 ug 23 porsiyento matag usa sa kanila nga masaligon sa bahin sa pagnegosyo sa ilang dapit. (mbcn/hfg/PIA-7)