Mga hingtungdan nipahigayon og risk mapping sa mga day care center

By Amorganda A. Saludar

CEBU CITY, March 14 (PIA) -- 19 ka mga hingtungdan gikan sa mga barangay sa San Isidro ug San Francisco isla sa Camotes, Cebu ang nagatapok dili pa lang dugay aron mopahigayon og risk mapping sa dapit nga nagpalibot sa umaabot nga Dolores Aboitiz Children’s Fund (DACF) Day Care Center sa naasoy nga mga barangay.

Ang mga kasamtangan nga representante sa Ramon Aboitiz Foundation, Inc. (RAFI) uban sa mga konsehales sa barangay, mga tanod ug mga magtutudlo sa daycare ang nangulo sa naasoy’ng kalihukan.

Nisalmot usab ang mga miyembro gikan sa Camotes Island Emergency Response Team (CIERT) kinsa nihatag sa ilang kaalam ug kaabtik alang sa naasoy’ng kalihukan.

Kini nga kalihukan kabahin sa day care construction sa DACF sa RAFI diin ang pundo gigamit sa mga hingtungdan nga barangay aron makamugna og mga lakang pag-ila ug pagpakunhod sa mga risgo ingon man katalagman ngadto sa komunidad nga nagpalibot sa mga day care centers.

Si DACF chair Amaya Aboitiz nipasabot nga tumong niini nga kalihukan mao paglambigit sa komunidad sa pagsiguro sa kaluwasan sa mga batan-on nga hingtungdan ingon aron makatampo usab sila sa kinatibuk-an nga pagpangandam sa barangay panahon sa kalamidad.

Atol sa maong session ang mga hingtungdan nga komunidad nakakutlo og mga kahibalo ug kahanas pagtino sa mga peligro ug makuyaw nga lugar palibot sa mga day care centers.

Ila usab nga gihukman ang kasamtangan nga kapasidad ug kaandam pagsumpo unya sa mga epekto niining maong mga peligro.

Gilibot ug gi obserbaran usab sa mga partisipante ang palibot sa day care center ug gipangita ang mga peligro ug kuyaw nga dapit.

Kini nga mga obserbasyon gihubad ngadto sa usa ka mapa nga nagpakita sa mga nagkadaiyang dapit nga peligro kinsa nagkinahanglan og pagtagad aron masiguro ang kaluwasan sa mga kabataan sa mga day care center. (AS/PIA-CEBU)