Balaodnon nagsugyot alang sa makiangayon nga bahin sa buhisan ngadto sa mga LGUs

By Amorganda A. Saludar

CEBU CITY March 12 (PIA) -- Aduna’y giduso karon nga tanyag sa senado nga nagsugyot alang sa makiangayon nga distribusyon sa buhis diin maghatag og 100 % nga bahin sa buhis ngadto sa local government units (LGUS) gikan sa kinitaan sa mga patigayon nga nahimutang sa usa ka lokalidad. 

Ang Senate Bill No. 105 o naila isip Rationalizing Local Taxation Act nga gipangamahanan ni Senator Chiz Escudero nagwala o naglibkas sa kasamtangan nga 30 % nga bahin sa matag LGU diin nahimutang ang usa ka patigayon. 

Ang naasoy’ng balaodnon nagsugyot usab sa katumanan niining mosunod nga mga alokasyon: ang 30% sa tanan nga mga paninda nga natala sa ulohan nga buhatan buhisanan sa siyudad o munisipyo diin nahimutang ang ulohan nga buhatan samtang 70% usab sa tanan nga mga paninda buhisanan sa siyudad o munisipyo diin nahimutang ang factory, project office, plant o plantation. 

Sumala pa ni Escudero nga tuyo niini nga mausab ang kasamtangan nga lagda sa buhisan nga giila ug gipahamtang sa Local Government Code.

Dugang pa niya nga tumong niini mao nga matagan og makiangayon nga bahin sa mga buhis ang mga LGUs. 

Gisugyot ubos sa Section 150 sa Local Government Code of 1991 kabahin sa lagda sa buhisan sa mga lokal nga patigayon nga ang tanan nga mga paninda nga gipahigayon sa lokalidad diin aduna’y mga sanga nga buhatan, tindahan o warehouse gikinahanglan nga matala kini sa naasoy’ng sanga nga buhatan, tindahan o warehouse ug ang buhis ibayad ngadto sa siyudad o munisipyo diin nahimutang ang patigayon. 

Sanglit ang mga magpapatigayon mas mopili sa hilabihan ka urbanisado nga mga siyudad dinhi sa nasud ang kasamtangan nga lagda sa buhisan nakamugna og argument tali sa mga LGUs.

Gibutyag ni Escudero nga kasagaran sa mga dagko nga patigayon motukod sa ilang paktorya o buhatan sa ilang mga proyekto sa mga dapit nga nahimutang sa probinsya apan ang ilang ulohan nga buhatan anaa nagbase sa mga siyudad. 

Matud pa niya nga ang maong balaodnon nagtinguha alang sa makiangayon nga distribusyon sa buhisan tali sa mga lungsod ug munisipalidad aron sila makakuha sa ensaktong bahin alang kanila. 

Gitataw sa senador nga aduna’y mandato ang konstitusyon nga naghimo sa LGUs nga independente ug segurado gayod nga makabarog sa kaugalingon ug nga ang SBN 105 haom gayud alang niini. (mbcn/AS-PIA-CEBU)