NTC-7 nipahimangno sa publiko sa dili pagtubay sa mga text scam ug mga ilad nga mensahe

By Minerva BC. Newman

CEBU CITY March 8 (PIA) -- Ang National Telecommunication Commission (NTC) sa Central Visayas mitambag sa publiko sa pagbaliwala lamang sa mga text scam ug mga ilad nga mensahe nga nikatap karon pinaagi sa mga mobile phones ug internet.

Mao kini ang gitataw ni NTC-7 regional director Engr. Jess Laureno atol sa gipahigayon nga AGIO-7 Forum on March 6 diin iya usab nga giaghat ang publiko nga motaho gilayon sa ilang buhatan kabahin sa mga text scam ug mga pagpanglingla nga mensahe nga ilang nadawat.

Dugang pa ni Laureno nga mamahimo nila na mablock ag usa ka mobile phone numbers sa panahon nga ila kining masusi ug mapamatud-an nga gigamit kini nga instrument pagpakatap sa mga text scam ug pag pangilad.

Matud pa niya nga gikinahanglan lamang nila ang ensakto nga kopya sa mensahe nga gipadala kanila ug I forward lamang kini sa buhatan sa NTC uban sa mobile phone sa nagpadala niini ug ang kompleto nga pangalan sa reklamante.

Apan giklaro usab niya nga kini nga proseso alang lamang sa mga text scam.

Aduna usa’y mga porma nga mahimo nga ma download sa website sa NTC diin I fill out lamang kini ug ipasa ngadto sa NTC alang sa mga reklamo.

Matud pa ni NTC-7 Legal Counsel and Information Officer Allan Macaraya nga gikinahanglan usab ang kumpirmasyon ug beripikasyon kung ang reklamo kabahin sa text scam ug uban pa nga pag pangilad nga mensahe ma probahan nga ensakto.

Dugang pa niya nga ang reklamante kinahanglan nga manumpa (sworn an oath) nga tinuoray gayud siya nga nakadawat sa maong matang sa mensahe.

Mahitungod sa promotional texts nga nikatap pinaagi sa mobile phones gikan sa mga content provider gipahimangnuan ni Macaraya ang publiko nga magmatngon ug mag abtik ug nga dili gilayon motoo sa unod sa mensahe.

Sumala pa niya nga susihon usa ang numero sa celfone sa content provider kung kini ordinaryo lamang nga 11- digit dako kaayo ang purohan nga ang maong mensahe walay kamatuoran gumikan ka yang lehitimo nga content provider kasagaran aduna lama’y tulo ngadto sa upat ka numero.

Gibutyag usab ni Macaraya nga ila na nga giduso ngadto sa kongreso ang sugyot sa pagparehistro sa tanan nga mga simcards gumikan sa kadaghan na ug sa kadali ra niini mapalit nga bisan sa mga kilid sa kadalanan gipamaligya ni kini.

Giklaro niya nga kini gitumong alang lamang gayud sa proteksyon sa mga konsumidor, apan sanglit anaa pa man kini sa kongreso iya lamang una ng gitambagan ang publiko nga dili motubag sa mga text scam. (mbcn/AS/PIA-CEBU)