Balaodnon nga mag klasipikar, mohimo sa pipila ka luna nga protected zones aprobado na

By Amorganda A. Saludar

CEBU CITY March 18 (PIA) -- Giaprobahan na ang onse (11) ka mga lokal nga balaodnon nga nagduso alang sa kausaban sa estado sa ubang mga isla ngadto sa pagka protected zone ingon man pagklasipikar pag-usab sa pipila ka mga luna ngadto sa residential, agricultural, o commercial nga dapit.

Ang Senate Committee on Environment and Natural Resources nga gipangulohan ni Sen. Chiz Escudero niaprobar sa mga House Bills Nos. House Bills Nos. 5116, 851, 3974, 4105, 951, 1719, 3973, 3975, 4657, 5409 ug 336.

Dinhi sa Tunga-tungang Kabisay-an usa ka barangay Lazi Siquijor, Bais Negros Oriental ug upat ka mga munisipalidad sa Sugbo ang napaubos sa probisyon ning mga nahisgutan nga balaodnon.

Ang HB No. 951 nagtinguha sa paghimo sa portion sa luna sa Barangay Simacolong sa Lazi, Siquijor isip alienable and disposable o wala na’y gamit samtang ingon usab niini ang dangatan sa usa luna sa Bais Negros Oriental ubos HB No. 5409.

Ang HB No. 3975 nag-aghat sa parte sa mga pampublikong luna sa munisipalidad sa Bantayan, Daanbantayan, Madridejos and Sta. Fe, Cebu nga magsilibi isip dapit alang sa agricultural, commercial, residential ug turismo nga kagamitan.

Aduna usa’y uban mga munisipalidad ug siyudad dinhi sa nasud nga nahimong hingtungdan ning maong mga aprobadong balaodnon.

Ang HB No. 5116, gipunting aron paghimo sa Murcielos Islands sa Labason, Zamboanga del Norte isip protected landscape ug seascape.

Ang mga parte sa giproteksyonan nga luna nga Roosevelt sa Dinalupihan ug Hermosa, Bataan gi klasipikar isip alienable and disposable o wala na’y bili ubos sa HB No. 851, ingon usab unya niini ang mahitabo sa luna nga nahimutang sa Barangay Combado in Maasin City, Southern Leyte ubos House Bill No. 4657 samtang ang HB No. 3974 nagpaubos sa parte sa Forbes Park Reservation sa Baguio City isip agrikultural nga luna.

Ang laing HB No. 4105 maghimo usab sa parte sa luna nga nahimutang Salvador Benedicto, Negros Occidental isip agrikultural samtang mahimutang sa susamang kondisyon ang pampublikong luna sa Siargao, Surigao del Norte. Mamahimo usab nga agrikultural ang parte sa luna sa in Barangay Sto. Nino in Sablayan, Occidental Mindoro ubos HB No. 3973.

Ang HB No. 336, nagtinguha pagtukod og Bikol Botanical Garden sa Camarines Sur. (mbcn/AS/PIA-CEBU)

============

P140M gigahin sa pagpalambo sa coastal areas sa mga LGUs sa CV

By Amorganda A. Saludar

CEBU CITY, March 17 (PIA) -- Kapin P140-M nga pundo ang gigahin ngadto sa siyam ka mga local government units (LGUs) dinhi sa Central Visayas ubos sa Integrated Coastal Resources Management Project (ICRMP) sa Department of Environment and Natural Resources (DENR).

Kini human ang ICRMP Regional Project Steering Committee (RPSC) niaprobar sa distribusyon sa naasoy’ng pundo ngadto sa mga natino’ng LGUs alang sa pagpalambo sa ilang sosyal ingon man inprastraktura alang sa kinaiyahan ug mga pasilidad.

Ang mga LGUs dinhi sa Sugbo mao’y nakakuha sa pinakadako nga bahin pinaagi sa P88,339,682.50 or 63.04 porsiyento nga gahin, diin unom ka mga munisipalidad ang makabenipisyo niini.

Ang Aloguinsan aduna’y gahin nga P7,036,815.50 alang sa katukoran sa proyekto nga mga pasilidad alang sa proteksyon sa ilang riverbank, samtang ang munisipalidad sa Ronda aduna’y gahin nga P19,840,397.00 alang sa pagpalapad ug rehabilitasyon sa Ronda wharf ug ang Alcoy makadawat usab og P19,813,920.00 alang sa pagpalambo ug pagpalapad sa Level III water system sa nahisgutang munisipyo.

Ang uban pa nga mga munisipyo nga nakabenipisyo ning maong proyekto naglakip sa munisipalidad sa Carmen alang unya sa katukoran sa Cantumog-Luyang river flood control system nga gigahinan sa kantidad nga 30 million pesos; Dalaguete alang sa konstruksyon sa Dalaguete wastewater treatment facility sa kantidad nga 6.5 million pesos; ug ang munisipalidad sa Samboan alang sa katukoran sa ecotourism park ug visitor center sa gahi’ng pundo nga P5,148,550.00.

Si DENR-7 Regional Executive Director Maximo Dichoso nagkanayon nga ang proteksyon, rehabilitasyon, konserbasyon ug pangagamhanan sa mga coastal resources sa nasud magdepende sa panagtambayayong ug kolaborasyon tali sa mga LGUs ug uban pa nga mga hingtungdan.

Samtang si DENR Secretary Ramon JP Paje nagmando sa mga rehiyonal nga buhatan nga mohatag sa gikinahanglan nga ayuda sa mga LGUs mapa teknikal man o administrative aron ang maong pundo mapagawas sa labing dali nga panahon human unya matigum ug matuman ang tanan mga kinahanglan nga dokumento ug mga papeles.

Ang probinsya sa Siquijor nakadawat usab og kinatibuk-an nga P51.8-M or 36.96 % alang sa tulo ka mga munisipalidad nga naglangkob sa Enrique Villanueva alang sa katukoran ug mga pasilidad sa ecotourism complex sa maong lugar nga ngakantidad og P5.9-M ug Larena alang sa ilang upland ug coastal ecotourism nga aduna’y gahin nga 15.9 million pesos, samtang ang San Juan aduna’y gahin nga P5.9-M alang sa katukoran sa ilang Level III water system.

Ang DENR maoy nangulo sa pagpatuman sa ICRMP uban sa pundo nga naggikan sa Asian Development Bank (ADB) , Global Environment Facility (GEF) pinaagi usab sa suporta sa uban pa nga mga nasudnong nga ahensya sama sa Bureau of Fisheries and Aquatic Resources, Department of Interior and Local Government, National Economic Development Authority, Department of Agriculture and Department of Budget and Management inabagan sa mga LGUs. (mbcn/AS/PIA-CEBU)

==========

Doh-7 motukod sa animal bite treatment centers dinhi sa CV

By Amorganda A. Saludar

CEBU CITY, March 17(PIA) -- Ang Department of Health (DOH) mo instalar og laing upat ka mga animal bite treatment centers sa Central Visayas.

Si DOH-7 Regional Rabies Coordinator Jocelyn Tabotabo nagkanayon nga aduna na’y 25 ka mga animal bite treatment centers dinhi sa rehiyon. Ang ipuno unya nga upat ka mga centro adto ibutang sa Camotes Island ,Bogo City sa Cebu , Candijay, Bohol, ug Canlaon City, Negros Oriental.

Sa gipahigayon nga forum sa mga information officers, si Tabotabo niaghat sa mga napaakan og mga hayop o mananap mga modangop gilayon sa mga treatment centers aron makapahimulos sa bakuna nga anti-rabies human unya malimpyohi sa sabon ug tubig ang ilang samad.

Gipasabot niya nga ang paghugas sa samad usa sa mga paagi aron pagwala sa virus gikan sa laway sa hayop o mananap.

Ang rabies usa sa mga gikonsederar nga pinasagdang sakit diin makamatay usab apan 100% nga malikayan.

Dili kini usa mga nag-unang hinungdan sa gidaghanon sa mga nangamatay ug nangasakit dinhi sa nasud apan giisip kini nga mahinungdanon problema sa panglawas sa publiko tungod kay usa kini sa mga hinungdan sa kadaghanan sa mga grabe nga makamatay nga inpeksyon. 

Si Tabotabo nitaho nga ang gidaghanon sa mga inpeksyon gumikan sa rabies nisaka gikan sa 26,298 in 2010 ngadto sa28,963 last year, o 10.13 % nga pagsaka.

Niadtong miaging tuig mikabat ngadto sa 387,918 o 71% sa mga iro dinhi sa rehiyon ang na immunized kompara sa 27 % sa 541,240 niadtong 2010. 

Si Tabotabo nagkanayon nga ning kasaulogan sa rabies month karon buwana ilang hingusgan ang programa sa pagbakuna sa mga iro aron makab-ot ang 80 % nga maximum aron mapakunhod ang gidaghanon insidente sa mga tawon’ng nangamatay.

Sa unang quarter sa 2012 ang talaan sa DOH nagpakita nga usa ka tawo ang namatay gumikan s rabies.

Samtang aduna’y 11 niadtong miaging tuig ug 10 niadtong 2010

Sa laing bahin ang nagpadayon ang gipahigayon nga pagbansa-bansay sa DOH 7 kabahin animal bite treatment sa 28 ka mga health information officers gikan sa upay ka probinsya sa rehiyon isip parte sa rabies awareness month celebration. (mbcn/AS/PIA-CEBU)

===========

Gi-uswag ang implementasyon sa umento sa Philhealth ngadto sa Enero 2013

By Juju Manubag-Empuerto

CEBU CITY, Marso 18 (PIA)--- Ang pagpatuman sa P2,400 nga umento alang sa tinuig nga tampo sa Philippine Health Insurance Corp (PHIC) alang sa Overseas Filpino Workers (OFWs) nga (sea-based) ilawom sa Overseas Workers nga Programa (OWP) gi-uswag sa Enero sunod tuig.

Si Atty Karisma Agraviador, ang hepe sa Public Assistance Unit sa Philhealth-7 miingon nga ang pag-uswag sa PhilHealth sa tampo para sa sea-based nga mga OFWs ngadto sa Enero 2013 nalagda sa Sirkular Numero 7-2012.

Dungag ni Agraviador nga ang PhilHealth nakadawat ug daghang paghangyo ug pag-apelar.

Gitagaan sa PhilHealth ug konsiderasyon tungod usab sa mga kalibotanhong krisis nga panghitabo nga miresulta sa pagpanguli sa kadaghanang mga OFWs.

Ang PhilHealth opisyal misulti usab nga ang umento sa tinuig nga tampo sa Philhealth nga P2,400 alang sa mga miyembro ubos sa programa nga nagbayad ug kinaugalingon, gi-esponsoran ug sa abrod nanarbaho nga nag-basi sa dagat kay ipatuman ug dayon karong Hulyo 2012.

Samtang kadtong miyembro ubos sa OWP nga nagtrabaho sa gawas sa nasod apan nag-basi sa yuta, gi-uswag na kini sa PhilHealth sa Enero, sunod tuig.

Gipahibalo usab ni Agraviador nga ang mga land-based nga mga OFWs nagbayad ug tinuig nga tampo nga P900 ubos sa programa sa Medicare saOverseas Workers Welfare Administration (OWWA).

Tuig na sa 2005 nabalhin sa PhilHealth ang Medicare nga function sa OWWA ug sukad niadto, nagpabilin nga P900 ang tinuig nga tampo sa land-based nga mga OFWs, sumala pa ni Agraviador.

Enero na rong tuiga nga gipasakaan sa Philhealth ang tinuig nga tampo sa mga OFWs nga land-based ngadto sa P1,200.

Mahimo ra gihapon dawaton sa Philhealth ang P900 nga bayad sa mga land-based nga OFWs apan molangkob ra kini ug siyam ka bulan nga tampo ug nagpabilin nga may P300 sila nga kulang sa tinuig nga bayranan, pagpatin-aw ni Agraviador.

Ang mga OFWs obligadong mobayad sa P300 nga kulang sa pagsubli sa mga OFWs para makumpleto ang P1,200 nga tinuig nga tampo ug dili mahunong ang pagpasakop sa PhilHealth, ingon ni Agraviador.

Ang mga OFWs makapili nga mobayad labaw sa usa ka tuig nga tampo apan sumadahon kini ug P1,200 ang tinuig nga tampo, panapos ni Agraviador. (mbcn/JSME/PIA-Cebu)