IC mopahigayon og tulo ka adlaw nga micro-insurance seminar dinhi sa Sugbo

CEBU CITY, March 6 (PIA) -- Ang Insurance Commission (IC) dinuyogan sa pakig-alayon sa Department of Finance (DOF) mopahigayon og tulo ka adlaw nga training and advocacy seminar ngadto sa hingtungdan karong umaabot Marso 6 hangtod na sa 8 karong tuiga. 

Ang maong kalihukan gitumong aron mapahingusgan ang pagdasig sa mga informal ug mga low income sector nga mosagop sa micro-insurance, ingon man aron mapalambo usab ang advocate-partners sa pagpromot sa microinsurance ngadto sa grupo sa mga informal ug low – income.

Tipik ning lukop nasud nga kampanya sa microinsurance literacy ang IC ug DOF niila sa panginahanglanon sa paghatag og tukma nga risk protection sa mga natumbok nga sektor ug sa panghinaut usab nga matabangan sila.

Sa kasamtangan ang IC uban sa DOF nipatuman na sa mga nagkadaiyang inasyatibo sa microinsurance. Kini nga mga inasyatibo gipaloyuhan sa mga proyekto sa microinsurance ubos sa Development Bank-Japan Fund for Poverty Reduction (Developing Microinsurance Project) ug sa German International Cooperation (Microinsurance Innovations Program for Social Security).

Dinhi sa Sugbo ang IC mopahigayon usab og‘Magpaseguro Para Protektado: Advocacy Seminar on Microinsurance karong umaabot Marso 9.

Si IC Commisioner Emmanuel Dooc mopasupot sa iyang keynote address ugmang adlawa samtang sa Finance Usec. Gil Beltran maoy motak-op sa nahisgutang kalihukan. (mbcn/AS/PIA-CEBU)

===========

PDEA 7 mihimo ug 92 ka ronda batok sa illegal nga droga sa sulod sa duha ka bulan ning tuiga

By Juju Manubag-Empuerto

CEBU CITY, Marso 05 (PIA) -- Sa unang duha ka bulan karong tuig 2012, ang Philippine Drug Enforcement Agency kon PDEA nakahimo ug duha ka pagronda batok sa ginadiling druga sa rehiyon sa Central Visayas sa pakigtambayayaong niini sa pulis ug uban pang tigpatuman sa balaod nga niresulta sa pagsikop sa 116 ka nga nasalaod.

Ang legal officer sa PDEA nga si Atty Mauro Licen misulti sa bag-ong gipahigayon nga Talakayan sa Isyung Pulis kon TSIP nga 280K ka pesos ang balor sa nasakmit nga ginadiling druga gikan sa Enero hangtod sa Pebrero karong tuiga.

Gipahibalo usab ni Licen nga 119 ka mga kaso usab ang napasaka sa korte sa mga taong nadakpan sa pagronda.

“Naningkamot ang PDEA pag-ayo nga masulbad ang suliran sa ginadiling druga sa rehiyon hilabina dinhi sa Sugbo kung dia diri ang kinabag-an”, pamahayag ni Licen.

Miangkon ang PDEA opisyal nga ang Sugbo ikaduha sa Manila nga may kinadaghanang panginahanglan sa ginadiling druga.

Dugang pa ni Licen, ang illegal nga druga molampos sa mga dakbayan tungod anaa diha ang kinabag-an sa mga tao ug kusog ang ekonomiya sa lugar. Timailhan nga mosaka ang panginahanglan sa mga drugang ginadili.

Dili kini maka-alarma tungod ila rang madumalaan ang mao nga suliran sumala pa ni Licen.. (FCR/JSME/PIA-Cebu)