Family access cards gipatuman sa mga dapit nga apektado sa linog sa NegOr

By Amorganda A. Saludar

CEBU CITY, March 2 (PIA) -- Ang Department of Social Welfare and Development (DSWD) mopatuman unya sa paggamit sa family access cards (FAC) ngadto na sa mga dapit nga apektado sa linog aron pagsiguro nga ang tanan nga mga apektado maatiman ug wala ni bisan usa nga mapasagdaan.

Kini gitumong usab aron malikayan ang pagkadoble unya sa mga hinabang ug serbisyo nga madawat sa mga biktima sa linog.

Tungod niini nga kalambuan ang DSWD nakahimo na unya sa pag-ila ug pag subay kinsa niadtong mga biktima sa kalamidad nakadawat ug nakabenipisyo na sa mga relief supplies gikan sa kagamhanan ug sa mga pribado'ng sektor ingon man anga mga nagkalain-lain nga serbisyo nga ilang napahimuslan sama sa psychosocial intervention, medical, ug pinuy-anan.

Ang nahisgutan nga card maghatag og detalye sa mga impormasyon sa tanan nga mga kliyente nga naserbisyoan sulod ug gawas sa mga evacuation centers.

Kini naglakip sa mga mosunod nga impormasyon; family composition, tukma nga address, gidaghanon ug klase sa ayuda nga nadawat, pirmi sa haligi sa panimalay, ang naghatag sa maong serbisyo, social workers ingon man mga local officials sama sa barangay captains ug mga mayors. 

Sa pagka karon mokabat na ngadto sa 61,027 ka mga biktima ang naserbisyoan diin moabot na usab ngadto sa kapin P24 milyones ang nagasto nga salapi sa gobyerno may kalambigitan niini.

Moabot na ngadto sa 3,526 ka mga panimalay ang gikatala nga naangkon og grabe nga kadaot samtang miabot na usab ngadto sa 5,978 ka panimalay ang nakaangkon og partial nga danyos.

Sa pagka karon aduna’y 39 ka mga evacuation centers nga nahabilin sa Negros Oriental diin 8,723 usab ka mga pamilya ang kasmatangan ug temporaryong nipasilong dinhi isip ilang pinuy-anan samtang nagpadayon pa ang mga aftershocks human sa linog. (mbcn/AS/PIA-CEBU)