DSWD 7 padayon sa paghatod og hinabang ngadto sa mga biktima sa linog

By Amorganda A. Saludar

CEBU CITY, Peb. 27 (PIA) -- Ang Department of Social Welfare and Development (DSWD-7) dinhi sa tunga-tungang kabisay-an nipadayon sa pag pang apod-apod og mga relief goods ngadto sa mga biktima sa linog didto sa Negros Oriental.

Sa usa ka press release, ang mga trabahante sa DSWD-7 nga gidestino sa mga apektadong lungsod sa unang distrito sa Negros Oriental aron sa paghatod og mga hinabang ngadto sa mga lugar nga dili maabot sa mga military dump trucks gumikan sa kritikal nga kondisyon sama pananglit sa pagguho sa yuta, guba nga mga dalan, ug mga hulga sa seguridad ingon man sa mga sapa.

Sumala pa sa DSWD-7 nga sa matag hulga mao usab ang kadako sa panginahanglanon nga makahatag og dinalian nga ayuda ngadto sa mga pamilya nga nawad-an sa ilang mga panimalay, mga mahal sa kinabuhi ug panginabuhian nga sa kasamtangan temporaryo’ng nipasilong sa mga evacuation centers.

Matud pa DSWD-7 information officer Jaybee Binghay nga mokabat ngadto sa 1,863 food packs ang gikatakda nga ihatod ngadto sa mga bukira’ng nga mga barangay sa Linantuyan, Hinakpan, Plagatasanon ug Balwage, tanan sakop sa Guihulngan sugod karong Pebrero 17 ug sa tibook semana.

Sa 33 ka mga barangay sa Guihulngan, sobra sa katunga na niini ang naadto ug nahatdan og hinabang sa Local Social Welfare and Services Office.

Kini naglakip sa mga food packs, tubig, tents, mga banig, mga sapot ug gamit sa kusina.

Samtang ang DSWD nipadayon sa ilang obligasyon pag panghatag og hinabang, nagsugod na usab kini pagmugna o mga stratehiya unsaon patukod ingon man pagdumala og mga evacuation centers samtang sila nangamdam na usab sa ilang pasiugdahan nga debriefing ngadto sa mga apektadong pamilya. (MBCN/AS-PIA7 Cebu)

==========

DSWD nakaserbisyo na sa 70 porsyento nga mga biktima sa linog sa Negros

By Amorganda A. Saludar

CEBU CITY, Peb. 27 (PIA) -- Ang Department of Social Welfare and Development (DSWD) dinhi sa Central Visayas nakaserbisyo sa mokabat ngadto sa 70 porsyento sa mga apektadong pamilya sa linog nga miigo sa Negros Oriental niadtong Pebrero 6.

Sa kasamtangan adunay mga 63899 na ang gidaghanon sa mga pamilya nga apektado sa maong linog. Kini naglakip sa duha ka mga lungsod sa Cebu nga mao ang Badian ug Ronda diin gikataho nga aduna usa’y 1,143 ka pamilya o 6,385 ka mga apektado’ng katawhan.

Sa pagka karon ang DSWD midoble sa ilang paningkamot sa paghatod sa mga hinabang ngadto sa mga apektadong dapit hilabi na niadtong mga bukirang dapit sa probinsya sa Negros Oriental.

Ang ubang mga katawhan nga nahimutang sa mga apiki nga lugar nanabok usab sa mga silingang lungsod ug probinsya alang sa ilang seguridad ug temporaryong kapuy-an.

Niadtong miaging semana ang mga hinabang nga gihatod pinaagi sa Phil Air Force (PAF) UH1N1 helicopter wala nagmalampuson human kini nakasinati og zero visibility gumikan sa bati nga panahon. Ang mga military trucks gikan sa Philippine Army ingon man usab ang mga dump trucks gikan sa Provincial Government sa Negros Oriental nipadali sa ilang pag panghatod niini nga mga hinabang ngadto sa mga bukirang barangay.

Ang uban sa mga biktima nga kinsa’ng mga panimalay nahiagum og partial nga danyos hinay-hinay na nga nakabalik sa ilang mga tagsa-tagsa ka pinuy-anan. Samtang ang uban kinsa’ng mga panimalay grabeng naapektuhan sa linog nagpabilin gihapon sa mga evacuation centers sa Guihulngan City, munisipalidad sa La libertad, Tayasan ug Jimalalud.

Sa pagka karon ang kagamhanan pinaagi sa DSWD nakapagawas na og kapin sa 20 milyones nga kantidad sa mga relief items, mapagkaon man o dili ngadto sa onse ka mga apektadong lungsod ug siyudad.

Wala nihiapil dinhi ang kantidad sa mga ayuda gikan sa Local Government Units (LGUs), Non-Government Organizations (NGOs), mga pribado nga katawhan mga business establishments ug partner government agencies. (MBCN/AAS-PIA7 Cebu)

===========

DENR-7 nitudlo og bag-ong director alang sa wildlife ug uban pa nga serbisyo

By Amorganda A. Saludar

CEBU CITY, Peb. 27 (PIA) -- Aduna na’y bag-o nga regional technical director (RTD) ang Department of Environment and Natural Resources ((DENR-7) dinhi sa tunga-tungang kabisay-an alang sa protected area, wildlife conservation zone ug management services (PAWCZMS).

Kini nakab-ot human si DENR Undersecretary for Field Operations Atty. Ernesto Adobo, Jr nipasupot sa Special Order Number 2012-59 niadtong Enero 20 ning tuiga nga nitudlo ni Mr. Al Orolfo isip OIC-RTD alang sa PAWCZMS.

Si Orolfo nihulip ni RTD Ruth Tawantawan nga karon nadestino isip Regional Director sa Environmental Management Bureau-11 didto sa siyudad sa Davao.

Sa sayo pa si RTD Tawantawan gidestino isip RTD alang sa PAWCZMS niadtong Pebrero 2011 hulip ni RTD Dioscoro Melana.

Si DENR-7 regional executive director Maximo Dichoso nagkanayon nga ang reassignment sa mga dagkong opisyal parte lamang sa organizational development nga establisar ni DENR Secretary Ramon J.P. Paje aron mapadayon ang mga nagkadaiyang flagship o mga programa ug proyekto nga labaw nga gipunting alang sa environmental protection ug management.

Si Orolfo naghupot og doctorate degree of Philosophy (PhD) sa Human Resources Management isip DENR scholar sa University of Santo Tomas (UST) diin siya ni gradwar isip summa cum laude niadtong tuig 2011.

Natapos niya ang degree nga BS Agriculture major in Agroforestry sa Bicol State University, College of Agriculture and Forestry niadtong 1989.

Ang PAWCZMS usa sa mga serbisyo sa DENR-7 nga gitumong alang sa development ug updating sa protected area management plan, delineation ug demarcation sa mga utlanan ug management zones, rehabilitation, restoration, ug resource protection.

Kini usab ang gisangonan alang sa kalambuan sa eco-tourism ug operasyon ingon man biodiversity monitoring ug pag pang isyu sa tenurial instruments sa Protected Area Management Board (PAMB).

Samtang kini usab mo superbisar ug mo asikaso sa nature conservation ug extension, mga programa sa biodiversity conservation nga ngalakip sa cave resources, wildlife conservation ug protection, wetland ug tarsier conservation project.

Ang turnover ceremony gipangulohan ni Dichoso atol mismo sa gipahigayon nga flag raising ceremony niadtong Pebrero 6, 2012 uban sa mga dagkong opisyales sa DENR-7. (MBCN/AAS-PIA7 Cebu)